حملة شفيق للمعارضه: الفريق شفيق مش فاضي يرد على الأطفال
قام الكاتب الصحفي والأكاديمي الأستاذ محمد فتحي مشكوراً برتوته (عمل ريتويت) لرابط صفحة حملة دعم أحمد شفيق رئيساً للجمهورية على الفيسبوك. وكانت الصفحة مشكورة أيضاً قد فتحت الباب لكل من لا يزال غير مقتنع بالرجل أن يدلي بدلوه ويتولون هم الرد عليه. ظننت الصفحة -وإن بعض الظن إثم- تحاول فتح مجال حقيقي للحوار كما يشير رأس الموضوع
ولذلك فقد أدليت بدلوي وسألت كل اللي في نفسي بصراحة وانا كنت شايل ومعبي ودار الحوار التالي: (تركت الأخطاء المطبعية كما هي لغرض في نفسي)
العبد لله:
1- أحمد شفيق كان رافض يعترف بالثورة وكان رافض حتى اللفظ وكان بيسميها احتجاجات وبعد ما أعلن ترشحه بقى بيقول ثورتنا. مش دة برضه يعتبر نفاق وانتهازية سياسية ومغازلة أصوات؟
2- في لقائه الشهير مع علاء الأسواني لما الأس...واني سأله معقولة انت مكنتش تعرف ان فيه فساد في الوزارة لما كنت وزير؟ رد قال له: مليش فيه يا علاء. انا وزير تكنوقراط بعمل شغلي ومليش دعوة بغيري (الكلام دة وهو لسة رئيس وزرا) وبعدين لما أعلن ترشحه طلع وقال انه كان منضم لجبهة من الوزراء في حكومة أحمد نظيف كانت معترضة على السياسات الفاسدة في الوزارة (يعني كان يعرف ان فيه فساد) السؤال بقى: أصدق انهي شفيق فيهم؟ شفيق الوزير التكنوقراط اللي ملوش فيه يا علاء؟ ولا شفيق عضو تنظيم الوزراء الأحرار في حكومة نظيف؟ والسؤال التاني (وهو الأوقع): البني آدم اللي مش قادر يثبت على رواية واحدة محددة لموقف اتخذه في المادي نسميه ايه؟
3 - ليه أحمد شفيق في كل حواراته بيدي ناس كتير الإحساس بإنه ما بيجمّعش؟
4- اللي بيقول الوزير المشاكس: هو كان بيشاكس في مين دة مفيش حد مكن الوزرا الا وبيقول بناء على توجيهات السيد الرئيس ولما السيد الرئيس اتخلع وبقى شفيق رئيس وزرا كان بيقول هما في المجلس الأعلى للقوات المسلحة قالولي ولما أعلن ترشحه قال انا استأذنت المشير يعني الأخ ماشي بمبدأ سمنا وأطعنا غفرانك ربنا وإليك المصير لكل من في إيده السلطة العليا طب لما يبقى هو السلطة العليا حيفضل برضه يستأذن المشير؟ وبالمناسبة إيه وضع المشير لو شفيق مسك الحكم؟ وهل صحيح انه عدم قدرته على الإجابة على نفس السؤال لما اتسأله في قناة البي بي سي خلى مدير حملتة ياخد التسجيل من القناه عنوة ويمنع عرضه؟
5- هو مش أحمد شفيق انته بتقولوا انه مدني وانقطعت صلته بالعسكرية اللهم إلا المعاش اللي بياخده من العسكرية (بالمناسبة هو لو مسك الرئاسة حيفضل برضه ياخد معاشه العسكري زائد مرتب الرئيس؟) ليه مصرين انكم تفضلوا تنادوه بسيادة الفريق (وتفكروا الناس بخلفيته العسكرية في وقت الناس بيقولوا يسقط حكم العسكر اللي فضل 60 مجابلناش الا الوضع المنيل اللي احنا فيه) مش الأولى انكم تنادوه بلقبه المدني وهو د. أحمد شفيق؟ (هو مش معاه دكتوراه برضه ولا أنا بيتهيألي؟)
6- يقصد إيه أحمد شفيق لما قال انه لا يسعى لمنصب قيادي بترشحه رئيس ؟
7- اللي بيقول انجازات أحمد شفيق في مصر للطيران ووزارة الطيران المدني (محدش يقدر ينكرها) والمطارات اللي طورها بس تعالوا نحللها هي ايه المطارات اللي طورها؟ مطار القاهرة (دا مطار العاصمة وواجهة البلد واللي بيستقبل فيه الرئيس الوفود الرسمية) ومطار برج العرب (اللي كان مطار عسكري وبعدين بقى مطار مدني وبيستقبل فيه الرئيس ضيوفه لما كان بيبقى في استراحته الصيفية في برج العرب أو في قصر رأس التين وبالمناسبة على حد علمي التوسعة الجديدة لم تفتتح في عهد شفيق بس لا ننكر جهوده فيها) ومطار شرم الشيخ (الدلع كله دي كانت بلد الرئيس واللي بتنعقد فيها كل المؤتمرات ) ومطار مرسى علم (بتاعة الهليبة الكبار من صحاب ولاد الريس) يعني كان تركيزه في كل المطارات اللي كان مبارك وألاضيش ابنه بيستعملوها انما بقى أخبار باقي المطارات ايه؟ مطار النزهة في اسكندرية (دكان)، مطار الأقصر (دكان) ، مطار أسوان (دكان)...إلخ وبمناسبة وزارة الطيران ومطار القاهرة أخبار ال 42 بلاغ اللي متقدمين في شفيق إهدار مال عام ومتصورين فيديو؟ محدش يقول لي النائب العام حفظها لما ملقاش عليه حاجة وهي بلاغات كيدية لإننا كلنا عارفين ان النائم العام بتاعنا مش نزيه وشغال عبد لمأمور ادبح يازكي قدرة يدبح زكي قدرة!!
8- موقعة الجمل أحمد شفيق ومحمود وجدي مسؤولين عنها مسؤولية سياسية حتى لو مش مسؤولين عنها مسؤولية جنائية محدش حقق معاهم ليه (وبرضه محدش يجيبلي سيرة النائم العام) ولما طلع أحمد شفيق اعتذر (كتر خيره برضه يشكر) ووعد انه حيحقق فيها؟ محقش فيها ليه؟ وإيه علاقته هو ومرتضى منصور باختفاء ملف موقعة الجمل من المحكمة باعتبار منصور متهم فيها جنائياً وشفيق ووجدي متهمين فيها سياسياً؟
9- بم تفسر عدم بدء أمن الدولة بفرف ونقل المستندات الهامة إلا بعد ترك شفيق لمنصب رئيس الوزراء ومجيء عصام شرف (اللي عرفنا بعد كدة انه سكرتير للمجلس العسكري زيه زي شفيق والجنزوري بعدهم)
10- اللي بيقول شفيق حارب في 73 باقي المرشحين عملوا إيه: هو لازم كل رئيس يجيلنا يبقى عنده حاحجة بيذلنا بها؟ مبارك بيذلنا بالضربة الجوية وشفيق بيذلنا بالمطار وبإنه حارب في 73 وكإنه مكانش بيأدي عمله لأ دة دة كان بيجبّي علينا؟! وبمناسبة الحرب مسمعناش ليه أي اعتراض منه على بقاء الفريق سعدالدين الشاذلي في المنفى أيام مبارك؟ مسمعناش ليه منه أي تعليق على تجاهل بطولات الفريق سعد الدين الشاذلي ودوره في حرب أكتوبر وانتزاع صورته من كل صور الحرب وحتى تجاهل ذكر اسمه ودوره في بانوراما حرب اكتوبر؟ ليه محاولش يرد اعتباره قدام الإعلام وقفتها؟ مش بتقولوا انه وزير مشاكس؟ هو مش الفريق سعد الدين الشاذلي كان برضه بيحارب في 73؟
وبصراحة لم أكن أتوقع ان يأتيني رد ولكنه جاء
الأخ المناضل:
1- لو كنت ركزت في كلامي أنا كلامي دقيق أنا قلت ناس كتير مقلتش الناس وبالتالي ملمحتش حتى اني باتكلم عن الناس كلها فلو انت مفهمتش دة تبقى مشكلتك مش مشكلتي. وعموماً في السياسة المرشح المفروض يوصل لمعارضينة لإنه مؤيدينه... حيأيدوه في كل احالات مهما عمل والمفروض انه مترشح عن مصر كلها مش عن فئة مؤيدينه بس إذا كان ناس كتير من معارضينه اللي واصلهم من لقاءاته انه ما بيجمعش يبقى دي حاجة المفروض الحملة بتاعته تدرسها وتحاول تقف على أسببها وتعالجها دي نصيحة مش أكتر ودة مش عيب. في العالم كله فيه حاجة اسمها Political Image Making يا ريت تفكروا تستعينوا بيها. أنا كناخب محتاج أشوف أحسن ما عند المرشحين عشان أعرف اختار.
2- انت مرديتش على أهم سؤالين السؤال بتاع تغير موقفه من الثورة من الرفض التام إلى التأييد التام والتحدث باسمها وما يعتري ذلك من شبهة نفاق وانتهازية سياسية ومغازلةو أصوات والسؤال بتاع عدم قدرته عاى الثبات على رواية واحدة لموقف اتخذه في الماضي (بالضاد أهو عشان ما تزعلش حاكم فيه مثل بيقول لك: يا با علمني الهيافة قال له تعالى في الهايفة واتصدر!!)
3- مرديتش على سؤال علاقته بالمشير حتكون إيه وإيه وضع المشير لو نجح في الانتخابات وعلى الاتهامات اللي بتوجه لمدير حملته بإنه صادر شريط لقاؤه بالبي بي سي لما معرفش شفيق يجاوب إجابة عدلة على نفس السؤال. ومرديتش على سؤال لو نجح برضه حيفضل ياخد معاشه العسكري زائد مرتب الرئيس ولا إيه؟
4- أنا ما بألفش ولو انتو كحملة دعاية مش عارفين تعملوا Tracking عدل لكل الكلام اللي بيقوله مرشحكم تبقوا حملة فاشلة وحتضروه مش حتنفعوه مهما كان عدد التوكيلات اللي عرفتوا تلموهاله ولو كانت دي طريقتكم في الرد على الانتقادات يبقى عليه العوض في الراجل في الانتخابات . وعموماً راجعوا لقاؤه مع لميس الحديدي اللي كان بيحاول فيه يتهرب من انه يعترف بطريقة مباشرة انه استأذن المشير.
5- انتوا كل ما بنقول ان شفيق رئيس عسكري بتقولولنا دة مدني وعلاقته انتهت بالعسكرية ومع ذلك مصرين تنادوه بالفريق شفيق يعني قمة التناقض ودة حيأثر بعد كدة في الدعاية. نصيحة كونوا متسقين مع نفسكم أنا بشكل شخصي مش مزعلني انكوا تنادوه بسيادة الفريق بس في المقابل تعترفوا انه رئيس عسكري ومتسوقوهوش على انه رئيس مدني. أما الخدمة العسكرية في حد ذاتها خصوصاً في حرب زي حرب أكتوبر شرف ليه ولكل مصري بس من غير ما يتاجر بيهاظ؟ منفعتش اللي قعد يتاجر بضربته الجوية 30 سنة! أما بخصوص يسقط حكم العسكر قارنوا الأعداد بتاعة عكاشة وسبليدر وعمرو مصطفى اللي بيقولوا (نعم لحكم العسكر ونعم للمجلس العسكري) وأعداد الناس اللي في الميادين بتقول (يسقط حكم العسكر) وبعدين نتكلم واسأل حضرتك أي خبير اقتصادي حيقول لك مفيش دولة متقدمة محكومة بحكم عسكري والدول القليلة الاستثناء بتؤكد القاعدة مش بتضعفها).
7- المطارات اللي بتقولوا ...انها على مستوى عالمي متبصوش بس على التصميم المعماري بصوا عكمان على التنظيم والإدارة وشوقوا مطار فرانكفورت ومطار شارل ديجول ومطار زيوريخ وحتى مطار دبي وشوفوا كمية الرحلات وال connections اللي عليهم وقارنوها بمطاراتنا وبعدين اتكلموا. أما بخصوص المطارات التانية مشفناش يعني عندنا في اسكندرية مطار النزهة حصل له اي تطوير اللهم إلا ترميم بس وكذلك مطار الأقصر وأسوان ولا دول مبيجيلهمش سياح؟ بطلوا مكابرة بقى واوزنوا الكلام قبل ما تقولوه. أي مطار في أي حتة في بلد معينه هو واجهة للبلد دي مينفعش اهتم بمطارات معينة واهمل مطارات تانية وعموماً ورونا أدلة على التطويرات في بقية المطارات يمكن انتوا شايفين حاجة احنا مش شايفينها.
8- طبعاً لازم يكون النائب العام بالنسبالكم شايف شغله كويس طالما ما بيهوبش ناحية شفيق بتاعكم لكن انتوا لو تابعتم بدون انحياز حتعرفوا النائب العام دة شكله ايه وليه ناس كتير بتطالب بإقالته.
9-هو رئيس الوزرا ووزير الداخلية مش مسؤولين؟ شراريب خرج يعني؟ مسؤولية القائد الأعلى للقوات المسلحة والشرطة لا تلغي مسؤولية الوزير ورئيس الوزرا ولو وزير الداخلية ملوش حكم على ظباطه انه يرجعهم يبقى وزير فاشل (دة طبعاً بافتراض جدلي ان انسحاب الشرطة مش متعمد وإنهم مش واخدين أوامر بكدة وسؤال ع الماشي قضية اللوا البطران ايه اللي تم فيها؟ وليه لغاية دلوقتي متكتمين عليها ومش بيحققوا تحقيقات جدية فيها؟)وحد يفكرني كدة باليمين الدستورية اللي حلفها شفيق ووجدي قدام الرئيس (اللي هي نفس اليمين الدستورية اللي الرئس والمشير نفسهم حلفوها)؟ مش هي دي اللي بيقول فيها "أفسم بالله العظيم أن أرعى مصالح الشعب وأمنه"؟ فشل وزير الداخلية ورئيس الوزراء في رعاية مصالح الشعب وأمنه يعتبر حنث باليمين الدستورية ومعلومة قانونية كدة ع الماشي : الحنث باليمين الدستورية يعتبر خيانة عظمى. محدش بقى يقوللي إيه اللي حشر شفيق ووجدي في الموضوع. الموضوع دة بالذات الكل فيه باطل والكل قبض ريح. أما بخصوص اختفاء ملف القضية فدة مش تأليف راجع النائب المحترم عصام سلطان واكلام اللي قاله والاستجواب اللي المجلس جهزه لوزير العدل بخصوص الموضوع وطبعاً وزير العدل محضرش لإنه معندوش حاجة يقولها وياللصدفة الشديدة كان مرتضى منصور امبارح الصبح في مكتب النايب العام هو وعكاشة وصرح الفريق بتاع مرتضى ان الكلام حول موقعة الجمل. محدش يقول لي كلام مرتضى منصور مع عمرو الليثي كلنا عارفين التاريخ المشرف لعصام سلطان والتاريخ المهبب لمرتضى منصور (اللي بالمناسبة عار على القضاء انتماء شخص زي مرتضى ليه مرتضى منصور كبيره عربجي)
10- مجيء شرف كان بالنسبة للداخلية مفاجأة مكانش حد يعرف انه حيبقى مستأنس زي شفيق وإلا مكانوش عملوا اللي عملوه.
11- ما شاء الله حضرتك جايب معلوماتك العسكرية عن الفريق سعد الدين الشاذلي من الفيلد مارشال جيهان السادات دكتوراه في العلوم العسكرية. جيهان لم تعد كونها قرينة السادات وكان بيتفصلها قوانين على مقاسها (وراجع قانون الأخوال الشخصية المعروف شعبياً باسم قانون جيهان) فهي آخر واحدة تتكلم عن الفريق الشاذلي اللي ضفره برقبتها هي وجوزها. ومع ذلك احب انك تسأل الفيلد مارشال جيهان مين السبب في ثغرة الدفرسوار ومين اللي كسينجر قال له لن نسمح بهزيمة السلاح الأمريكي مرتين ومين اللي زعق في وش السادات لإن كان ممكن الثغرة دي متحصلش لولا قراراته اللي كان عايز بيها يجري يستجيب للضغط الأمريكي ويقعد على مائدة المفاوضات بعد ما حقق انتصار شكلي كان ممكن يبقى انتصار كامل لولا قراراته واللي بيها قبل بكل الشروط اللي كان عبد الناصر رافضها من غير حرب. اسألها عن سعد الدين الشاذلي اللي اتقدم ببلاغ يتهم فيه السادات بالخيانة العظمى عشان كان في إيدة يمنع ثغرة الدفرسوار ويحقن دماء جنوده بس معملهاش وعلشان اتفاقية كامب ديفيد المجحفة اللي احنا لية بنعاني من أثرها لغاية دلوقتي. وأهم من دة كلة منين المعلومات دي ان الفريق الشاذلي كان حيوقع الجيش؟
عموماً انا مش بألف انا بتكلم كلام منطقي والمفروض ترد عليا رد منطقي مناظر بس انت فضلت انك ترد رد عاطفي وعشان كدة انا مش عايز الرد منك على الأسئلة العشرة بتاعتي مضافاً إليهم السؤال رقم 11 اللي حقول دلوقتي:
عمل ايه الفريق شفيق بصفته قائد قوات جوية وبعدين مدير لمصر للطيران وبعدين وزير طيران مدني وبعدها رئيسش وزراء في قضية الطيارة المصرية اللي وقعت في أمريكا وكانت بتضم خيرة عسكريينا وعلماءنا؟ ليه لغاية دلوقتي مفتحش تحقيق جاد فيها طول السنين دي؟ وليه ما أعادش فتح التحقيق فيها بعد الثورة؟ ولا دي عشان حتطير فيها رقاب ناس كبار قوي فمش عايز يخش عش الدبابير برجليه؟ ولا يكونش دول كمان كانوا عايزين يوقعوا الجيش فالحمد لله انهم وقعت بيهم الطيارة؟
أنا عايز الرد على 11 سؤال من أحمد شفيق نفسه تاخد بعضك وتروحله وتوريله الأسئلة دي وتجيب الرد منه شخصياً. أنا مواطن وناخب ومن حقي انه يجاوب على أسئلتي. بس يا رب بس بعد ما يشوف الأسئلة ا 11 مايقولكش: ايه؟
وبعدين يا جماعة الراجل جمايله مغرقاني يا جماعة بيديني معلومات قيمة مش عارف من غيره انا كنت عملت ايه في حياتي يا ربي. طب أرد جمايله ازاي؟ مفيش غير ان انا ارد عليه واقول له:
الرد على -------: أشكرك على رقيك في الحوار وردك يدل على ضعف حجتك لإنك لو لاقي منطق ترد بيه كنت قارعت الحجة بالحجة ومكنتش حولت الموضوع لهجوم شخصي عليا مع ان دة خلاف في رأي سياسي يا من تدعون إيمانكم بالديمقراطية وتقبلكم للنقد وفعلاً اثبت لي بالدليل القاطع انك بتيجي في الهايفة وتتصدر. وعموماً انا قلتلك قبل كدة ان أنا مهتم أكتر برد مرشحك على ال 11 سؤال مع كامل احترامي لرأيك بس أنا من حقي كناخب ان المرشح نفسه يرد على أسئلتي اللي أعتقد إن ناس كتير من غير المؤيدين لأحمد شفيق يحبوا يسمعوا إجابته عليها لإنه محتاج أصوات الناس دي لإنه في النهاية عايز يبقى رئيس مصر كلها مش رئيس مجموعة الشباب الحلوين أعضاء حملته الانتخابية. وخلينيأنا كمان أرد لك جميلك بتعليمي ان الماضي بيتكتب بالضاد (الحفيقة معلومة قيمة مكنتش أعرفها قبل كدة) وخليني اعلمك كام حاجة كدة:
1- فيه اختراع عظيم عرفته البشرية من حوالي 1400 سنة ويمكن أكتر اسمه : "إقرأ" جربه الاختراع دة جميل جداً وحيفرق معاك كتير.
2- خلي أحمد شفيق ياخد الأسئلة ال 11 بتاعتي دي وينزل في مؤتمر صحفي أو لقاء تلفزيوني ويرد على الأسئلة دي خليه يبقى أول واحد من المرشحين اللي يردوا على أسئلة معارضيهم في مؤتمر صحفي وكل المرشحين يعملوا زيه زي ما كان المفروض يكون هدف الصفحة دي إلا إذا كنتوا عاملينها بس عشان تغنوا وتردوا على بعض
3- لو كل فريق العمل في حملة أحمد شفيق الانتخابية بيفكروا بنفس منطقك دة ودي طريقتهم في الرد على معارضيهم يبقى مرشحكم خسران خسران لا محالة.
اتمنالكم حظ سعيد لإن المناظرات اللي المفروض تحصل بين المرشحين حتكون أقوى من كدة بكتير ويا رب تعرفوا تكونوا قدها
وطبعاً لا يكف أخونا عن إدهاشي!! كل أما أقول لا يمكن يبقى في أعاجيب أكتر من كدة اكتشف ان معينه من الأعاجيب لا ينضب.
الأخ المناضل:
الرد على احمدعبد الهادى ..بقى ان حجتى ضعيفة هههههههههههههههههههههههه ده انا بعلمك ازاى تكتب ... و بعدين اديلك مثال على التخاريف بتاعتك عشان انت عايش الوهم و رايحة منك خالص ... فى الاول بتقول ناس كتير اقولك اتكلم بأسمك و متتكلمش بأسم الناس ...تقولى انا بقول ناس كتير مش كل الناس ههههههه ما شاء الله على المنطق و الكلام العاقل الموزون و مين برضه اللى خلاك تتكلم بأسم ناس كتير ما تتكلم عن نفسك بس ... و مثال تانى على سؤالك عن المقصود بتصريح الفريق احمد شفيق انه مش طمعان فى المناصب مع ان التصريح شارح نفسه و اى واحد بيفهم حيعرف ايه المقصود منه لكن انت مش فاهمه و انا فهمتهولك تقوم ترد و تقولى لو انت مش فاهم قصدى تبقى دى مشكلتك ... ه اى تقليد و خلاص .... و بعدين عايز منقولش الفريق شفيق ... انت مالك انت نقول ولا منقولش و لا نقول مدنى ولا عسكرى ... انت مين انت عشان تقولنا نقول ايه و منقولش ايه .. و بعدين عايز الفريق شفيق يرد على اسئلتك ... هو الفريق شفيق فاضى للرد على الاطفال ؟؟؟ و كمان فى واحد عمال يطبل ورا الردود بتاعتك و ما شاء الله ردوده كلها الفاظ خارجة و قلة ادب بس هو معذور لأن كل واحد بيعبر عن البيئة اللى نشأ فيها و عن التربية اللى اترباها و زى ما انت شايف محدش رد بأى لفظ خارج و ده يدل على ان الموجودين ناس محترمين و شوف انت بقى لما ده يبقى الوحيد اللى بيأيدك وبكلامك الطفولى ده يبقى فعلا الطيور على اشكالها تقع
لأ بجد يا جماعة الراجل جمايله مغرقاني من ساسي لراسي ومش عارف أعمل إيه عشان أرد ولو 10-15 من جمايله دي اللي مش عارف أروح منها فين؟
العبد لله:
الرد على -------:
برافو برافو والله سعادتك أحسن واجهة أي سياسي منافس لمرشحك محتاجها عشان يسقطه. خليني أرد جزء من جمايلك اللي انت مغرقني بيها وأقول لك انك عندك تشويش رهيب في تعريف كلمة المنطق عشان أعالجك لازم أرجع أعلمك لغة عربية من أول ...وجديد وأرجع أعلمك فلسفة ومنطق وأعلمك كمان حاجة اسمها التفكير العلمي وحاجة تانية اسمها القراءة النقدية بس عشان ضيق الوقت والمساحة (أنا عارف ان ورا سعادتك مشاغل كتير مش فاضي للأطفال أمثالي) حعلمك كام حاجة كدة في مباديء علم السياسة:
1- السياسة فيها 3 فرق الموالاه اللي هي سعادتك والمعارضة اللي هي العبد لله والحياد (أو عدم الانحياز) اللي هما الناس اللي مش فارقة معاهم حضرتك او العبد لله أو المرشحين اللي بندعمهم او القضية كلها من أساسه. مينفعش في السياسة اتك في أي مناظرة سياسية تسفه المعارضة وتقول عليهم أطفال لإنك كسياسي محتاج أصوات الناس كلها ولذلك مضظر انك تستحمل كل الانتقادات وترد عليها بالمنطق مهما كانت بالنسبة لك تافهة وغير ذات قيمة أو أهمية لإن الشعب في النهاية هو الحكم. يعني لو حد من الشعب كان عايز ينتخب مرشح معين وبعدين سمع حد من الحملة الانتخابية بتاعة المرشح دة بيقول "معنديش وقت للرد على المعرضة لإنهم أطفال" فكرك كدة البني آدم دة ممكن يدي للمرشح دة صوته؟ طبعاً لأ. وهي دي غلطة نظام مبارك اللي ودته في داهية الاستهانة بالمعارضة وعدم الالتفات للانتقادات مهما كانت بسيطة وتافهة. كمان مينفعش انك تحول خلاف سياسي لخلاف شخصي لإنك كدة بتضعف موقفك قدام الناس وبتدي انطباع قد يكون خاطيء انك معندكش منطق ترد بيه يعني مثلاً مينفعش انتقد موقف سياسي ليك فترد عليا بإنك تنتقد تسريحة شعري أو طريقة لبسي أو لدغتي (لو عندي لدغة)
2- مفيش حاجة في السياسة اسمها اتكلم عن نفسك وبس لإن أي رأي انت بتقوله بينسحب بالضرورة على التيار اللي انت بتنتمي ليه شئت أم أبيت (غير منطقي طبعاُ من الناحية النظرية بس حتعمل ايه هي كدة السياسة) يعني كمثال تبقى غلطان لو افتكرت اتك الكلام اللي انت بتقوله هنا ع الصفحة بيعبر عن وجهة نظر خاصة بيك. لأ يا سيدي الفاضل الكلام اللي انت بتقوله هنا بينسحب عليك وعلى حملة أحمد شفيق وعلى أحمد شفيق نفسه زي بالظبط لما الأخ اللي بيأيدني استخدم تعبيرات غير لائقة وانسحب الكلام دة عليا أنا مع إني مقلتوش وخلاك تحطنا أنا وهو في سلة واحدة وانا تقبلت دة لإن هي دي السياسة. بمعنى آخر ان اللي حيخش الصفحة دي يقدر يستنبط حاجات كتير قوي عن أحمد شفيق وعن أعضاء حملته بل وكمان عن قيادات الصف الأول والتاني اللي حيبقوا معاه لما ينجح (بافتراض طبعاً انه حياخد حد من الحملة بتاعته في مناصب قيادية).
3- مفيش حاجة في السياسة اسمها انا اعمل اللي انا عايزه انت مالك لإنك انت ارتضيت انك تخش لعبة السياسة يبقى تلعبها بشروطها مش بشروطك ومن أهم شروطها انك إي حاجة تعملها أو تقولها حتلاقي اللي يقولك ليه وازاي وانت بتضحك عليا وانت بتستغلني ... إلخ ولازم تقدر دة وتتعامل معاه بحكمة لإن دة قدرك بما إنك اخترت تلعب سياسة.
حاجة كدة ع الماشي بقى على موضوع التقليد فيه حاجة اسمها الكتابة التهكمية أو الكتابة الساخرة من ضمن أساليبها انك انت تستخدم نفس منطوق كلام المنافس بتاعك أو نفس طريقته في إنك ترد عليه وأبرز أمثلة على الكلام دة شعر النقائض بتاع جرير والفرزدق والأخطل. أنصحك انك تستخدم الاختراع اللي قلتلك عليه في الرد اللي قبل دة عشان تعرف أكتر . حتستمتع والله.
حاجة أخيرة وحتكلم المرة دي عن نفسي عشان متزعلش أنا لو كان عندي مثقال ذرة من إيمان بإن أحمد شفيق ممكن يكون عدل بعد المناقشة دي تأكدت بما لا يدع مجالاً للشك إن أحمد شفيق لا يصلح أبداً للمنصب دة.
طب بالذمة مش الرد دة اقل بكتير من جمايله اللي محاوطاني من كل حتة؟ طب أعمل ايه يا ناس دلوني؟
أليس فيهم رجل رشيد يرد على اسئلتي الحائرة بلاً من تضييع الوقت مع أمثال ذلك العبقري؟
يا جماعة اللي عندة أسئلة تانية يا ريت يتفضل يضيف على الليستة شكلنا مش حنلاقي حد يرد علينا خالص وحنضطر نطبعها في كتاب نسميه "تساؤلات الشاب الأوفر في زمن البلوفر"!!
