ذكريات رجل مهم

صديق عمري وصاحبي وحبيبي وكفاءة شريف نبيل كتب مقالة أكثر من رائعة فقررت اني أشركه معايا في المدونة بالعافية وغصب عنه لإنه كاتب موهوب جداً ومش عارف قيمة نفسه


اليكم المقال:





بعد انتهاء انتخابات الإعاده فى يونيو ٢٠١٢ جلس احد رجال النظام السابق الصغار فى مكتبه الفخم مره اخرى بعد غياب دام عام ونصف، وخلال تحسسه للسطح الخشبى الفاخر لمكتبه الفخم رجع بذاكرته ٧ اشهر ليتذكر حواره مع احد اكبر رجال نظام مبارك

نوفمبر ٢٠١١
---------------
*الحق يا باشا

*ايه خير فى ايه

*المجلس العسكرى يا باشا حدد مواعيد انتخابات الرئاسه اخر يونيو المقبل ووعد الشعب بتسليم السلطه

*متخفش هم بينيموهم شويه علشان يهدوا واحنا حنولع البلد خلال الفتره الجايه والانتخابات تتأجل

*تمام كده يا باشا احسن انا اتخضيت

*متقلقش كله محسوب

---------------------------------------------------------------------------
ديسمبر ٢٠١١
---------------
*وبعدين يا باشا الناس مصممه على تسليم السلطه ومش نافع معاهم لا محمد محمود ولا مجمع علمى ولا مسبيرو ولا بلطجيه ولا حاجه والعيال معتصمين امام مجلس الوزراء والمجلس كل يوم بيأكد انه حيسلمها اخر يونيو

*ولا يهمك حننزل الانتخابات ونكسبها بمرشح تبعنا

*ازاى يا باشا وهم الثوار حيسيبوك

*يا عم الثوار بيقطعوا فى بعض ومش مجتمعين اصلاً على حاجه والاخوان قالوا مش نازلين الرئاسه والبرادعى بنشتغل عليه دلوقتى وحينسحب بسبب اللى بيحصل يبقى خلاص بتاعتنا

*طب والسلفيين يا باشا دا عندهم مرشح اسمه ابو اسماعيل عمال يجمع فى اصوات الناس

*متقلقش رجالتنا بيدعبسوا وراه واكيد ليه غلطه

*الله ينور عليك يا باشا

---------------------------------------------------------------------------
يناير ٢٠١٢
---------------
*يا باشا الايام بتجرى بسرعه والبرادعى انسحب فعلاً زى ما قلت بس ابو اسماعيل شعبيته بتزيد بطريقه مخيفه ولو دخل الانتخابات كده حيكتسح انا بدأت اقلق

*متقلقش احنا محضرين مدبحه الشهر القادم وممكن تولع البلد ونلغى الانتخابات

*مدبحة ايه يا باشا الناس خلاص مبقاش يفرق معاها

*لأ دى بقى حاجه تانيه حنخلص على الالتراس فى بورسعيد ونرتاح منهم وطبعاً زمايلهم مش حيسكتوا وحيولعوا فى بورسعيد انتقاماً وكله فى صالحنا

*ايه الحلاوه دى يا باشا دماغك دى متكلفه قوى

---------------------------------------------------------------------------
فبراير ٢٠١٢
---------------
*حوار بورسعيد مجبش نتيجه يا باشا وشكلها كده الانتخابات حتتعمل يعنى حتتعمل وابو اسماعيل فى العلالى ومش حينفع التزوير معاه ومرشحنا مش حيعرف يصد

*عايزكوا تلمعولى ابو الفتوح على الفيسبوك وخلى الشباب يرتبط بيه وشبهوه بالبرادعى وكده حيلم اصوات الاخوان والثوار ونبقى اضعفنا شويه من اصوات ابو اسماعيل لغاية ما نطيره انا جتلى اخبار حلوه عنه ممكن تطيره بره السباق

*بجد يا باشا دا كده يبقى فل قوى

---------------------------------------------------------------------------
مارس ٢٠١٢
---------------
*كده ابو اسماعيل بره زى ما قلت يا باشا بس اللى مخوفنى شعبية ابو الفتوح اللى فى الطالع كل يوم

*متقلقش احنا رمينا طعم للاخوان وحنخلى شبابهم يسيبوا ابو الفتوح

*طعم ايه يا باشا

*افرجنا على الشاطر وبنخوفهم من ابو الفتوح وهم شربوا الطعم وحينزلوا بمرشح يضرب فيه وكده مرشحنا يبقى لوحده

*لما نشوف يا باشا بس المرشح بتاعنا واقف محلك سر

*متقلقش حنلمعه فى الاخر علشان يدخل الانتخابات وهو طازه

---------------------------------------------------------------------------
ابريل ٢٠١٢
---------------
*ابو اسماعيل عامل لبش جامد وخلعه حيبقى صعب والاخوان نازلين بتقلهم يا باشا ولو ابو اسماعيل خلع، الشاطر حيركب مكانه

*متقلقش مش انا قولتلك رمينالهم الشاطر طعم

*مش فاهم يعنى حتستبعدوهم هم الاتنين يا باشا، ده كده البلد تولع ومش حنعرف نسيطر عليها تانى

*عيب عليك انا اتفقت مع عمر سليمان حينزل الانتخابات

*وهو عمر سليمان لو نزل يا باشا حيكسب!! ده حياخد من اصوات مرشحنا

*عمر سليمان نازل زى ولد الكوتشينه يقش الطربيزه ويطلع، وساعتها محدش حيقول بم

*الله عليك يا باشا يا ابو دماغ ذريه يعنى كده مش حيتبقى غير ابو الفتوح والبديل بتاع الاخوان

*بديل الاخوان امره سهل ولو وقفت عليه فى الاخر وعاد مع مرشحنا مفيش حد حيقف معاهم بعد كل اللى عملوه الفتره اللى فاتت، المهم دلوقتى ابو الفتوح ده اللى لو دخل فى اعاده مع مرشحنا كله حيلتف حوله وحيكسب مرتاح

*طب وده نعمل معاه ايه يا باشا

*لمعولى حمدين صباحى وخالد على ونزلوا فيديوهات واخبار قديمه عن ابو الفتوح وانتمائاته الاخوانيه وانشروا على الفيسبوك موضوع تأسيسه للجماعه الاسلاميه انا عارف الناس بتترعب من النوع ده والثوار حيفضلوا صباحى عليه بجانب خالد على اللى حياخد اصوات الثوار الليبراليين وكده نبقى فتتنا الاصوات المضاده على اربع او خمس مرشحين ونضمن ان مرشحنا يبقى راكب

*تمام يا باشا، عُلم وينفذ بس لو صباحى أكل الجو حنعمل ايه، ده وطنى جداً وله كاريزما عاليه وبيعرف يتكلم كويس ويجمع الناس حوله زى عبد الناصر، والغلابه لما بيحبوا حد مبيتركهوش بسهوله

*متقلقش شويه وحننشر له فيديوهات ومقالات وهو بيمجد فى القذافى وبشار وعشقه لعبد الناصر وفكره اللى صنع اصلاً دولة العسكر، كل واحد وليه غلطاته واحنا عندنا غلطات الكل وبنعرف امتى نخلى اللجان الالكترونيه تنشر ونعمل بلبله

*هو ده شغل المعلمين يا باشا

---------------------------------------------------------------------------
اول مايو ٢٠١٢
---------------
*فى كلام يا باشا ان صباحى وبقيت الثوريين حيتحدوا ومش بعيد ينضملهم ابو الفتوح

*دى تبقى مصيبه وممكن نتقلش من اول مره انا بشتغل ان احنا نمنع حدوث ده بكل الطرق

*كلنا معاك يا باشا انا مشغل اللجان الالكترونيه بتاعتنا على ودنه علشان تفرقهم بس دول اصواتهم كثير والاستطلاعات بتاعنا بتقول ان مرشحنا نسبته بين ٢٠ و ٣٠ فى المئه على الاكثر يعنى لسه ٧٠ او ٨٠ فى المئه، ليه منستبعدش الراجل التانى بتاعنا واهو كده نضمن اصواته هو كمان 

*لأ غلط ده شغال كويس قوى وشايل عن مرشحنا بلاوى وكله مركز عليه وسايب الراجل بتاعنا فى حاله، خلعه دلوقتى غلط وحيسخن الكل على الراجل بتاعنا وبعدين الاصوات اللى معاه مش كثير ومش حتفرق معانا دلوقتى

*ازاى مش حتفرق معانا مش فاهمك يا باشا

*فى ناس ضميرها بيوجعها ومش عايزه تختار حد ضد الثوره بس الناس دى طيبه وقلبها ابيض وبتحب تمشى جنب الحيط وبيحبوا الامان وبيفضلوا اللى يعرفوه عن المجهول ووجود الراجل ده محسسهم ان مرشحنا مش ضد الثوره ومخلى صوتهم معانا و الناس اللى مع الراجل التانى لما يخسر حيروحوا لمين فى الاعاده غير انهم يبقوا معانا ونتيجته فى المرحله الاولى حتخلى نتيجة الانتخابات اكثر واقعيه ولو اتزنقنا قوى نسحبه فى اخر كام ساعه ونشغل الاعلام والناس بانسحابه

*تمام يا باشا وجهة نظرك فى محلها

---------------------------------------------------------------------------
٢٥ مايو ٢٠١٢
---------------
*الله عليك يا باشا، لعبتها صح وبالورقه والقلم الراجل بتاعنا طلع الاول مع انه لم يتخطى ال٢٥ ٪ وكل اللى خايفين منهم قلشوا مفضلش غير المرسى اللى طلع الثانى

*ما انا قولتلك تفتيت اصواتهم دى اهم حاجه علشان تعرف تخرجهم من السباق، يعنى الراجل بتاعنا والاخوان مجموعهم اقل من ٥٠ ٪ ومع ذلك موجودين فى الاعاده والراجل التانى بتاعنا قولتلك مكنش حيفرق

*بس تصدق يا باشا لو كان الثوريين حمدين صباحى وخالد على وابو العز الحريرى والبسطاويسى اتحدوا كان زمانهم فى الإعاده دلوقتى ومتفوقين كمان

*ومتنساش ان لو ابوالفتوح والعوا كانوا اتحدوا كانوا دخلوا الإعاده برضه

*صح يا باشا ولو كانوا كلهم اتحدوا كانوا حيكسبوا من اول جوله، انا مش فاهم هم ازاى متوحدوش علينا، طب الشعب جديد فى الديمقراطيه وعرفنا نضحك عليه لكن الناس دى عرفتوا تفرقوهم ازاى

*دى كانت صعبه واخذت من رجالتنا مجهود جامد، ببساطه طمعنا كل واحد فيهم بالرئاسه وحسسناه انه مش حيحتاج للباقى بجانب تخويف البعض من الأخر على اساس انهم فاكرين ان منهم من يعمل مع العسكر فى الخفاء

*يا سلام عليك يا باشا بس حتعمل ايه مع المرسى

*هى دى اللعبه اللى بنلعبها من زمان، دلوقتى الكل مرعوب من الاخوان ومحدش عايز يعطيهم الرئاسه علشان ما يبقاش رئيس ومجلس شعب وبالتالى حكومه ولجنة اعداد دستور

*بس تفتكر الاسلاميين مش حيتحدوا علينا

*احنا دلوقتى معانا كل اللى بيقولوا عليهم فلول وكل المرعوبين من الاسلاميين ودول اكثر ومتنساش ان المسيحيين عمرهم ما حينتخبوا الاخوان ومتنساش الشباب اليسارى والليبرالى اللى محبط، دول مش حينزلوا فى الاعاده واللى حينزل منهم حيصوتوا لينا طبعاً، متقلقش الاخوان وانصارهم لن يتعدوا ال٤٥٪ على اقصى تقدير وكله بالديمقراطيه وبانتخابات سليمه ونزيهه ١٠٠٪

*هو ده الشغل ولا بلاش يا باشا

---------------------------------------------------------------------------
٢١ يونيو ٢٠١٢
---------------
*مبروك علينا الرئاسه يا باشا الراجل بتاعنا اخذ ٥٦٪ زى ما توقعت بالضبط

*علشان تسمع كلامى، فى حد كان يتخيل ان بعد الثوره وكل القتل والسحل اللى عملناه فى الثوار ييجى الشعب يختارنا تانى وبانتخابات سليمه كمان

*الصراحه ده ولا فى الخيال مين كان يتخيل

*كله بفضل رجالتنا وشغلهم بتواصل خلال سنه ونص 

*ومتنساش غباء الثوار يا باشا وعناد الاسلاميين وعدم تنازلهم عن افكارهم

*ومتنساش انت عناد المرشحين وعدم توحدهم، لو كانوا توحدوا على مرشح واحد كان كل مجهودنا راح هباء

*طب انا عندى سؤال يا باشا

*اسأل براحتك

*افرض يا باشا البرلمان والاخوان عملوا دستور وخلوا النظام برلمانى

*متقلقش مش حيلحقوا

*مش حيلحقوا ازاى يا باشا

*احنا اعطينالهم الفرصه انهم يحطوا الدستور وهم اتدلعوا خلاص راحت عليهم

*راحت ليه يا باشا هو ايه اللى حيحصل

*البرلمان حيتحل وحيندموا على فرصتهم اللى ضيعوها

*يتحل ازاى يا باشا

*متخفش كله دستورى وقانونى واحنا مجهزين كل حاجه والدستور حيقول ان الدوله رئاسيه وفى انتخابات نزيهه بشهادة كل العالم لسه منتهيه وفى رئيس منتخب من الشعب والعسكر مشى ويبقوا ياخدوا البرلمان تانى لو يعرفوا

*ماهى الناس اللى انتخبتهم حتنتخبهم تانى يا باشا حتغير رأيهم ازاى

*الامن حيرجع والازمات حتخلص والناس حتلاقى الغاز والعيش والبنزين وكل البلطجيه حيتقبض عليهم والراجل بتاعنا حيعمل شو جامد والناس كلها حتهتف بحياته

*ياااااااه يا باشا ده انا كأنى كنت عايش فى كابوس اسمه ثوره وانزاح
---------------------------------------------------------------------------

اللى مكتوب ده مش مقال لعلاء الاسوانى ولا منقول من اى مقاله بل هو تخيلى الشخصى لما يحدث معنا نحن الشباب حديثى العهد بالحياه السياسيه وكيف يُلعب بنا مثل العرائس عن طريق الاعلام ... انا اخترت انى اكتب الكلام باسلوب الاسوانى عن طريق حديث بين شخصين لإقتناعى انها من اسهل الطرق لنقل فكره او وجهة نظر

كلنا مقتنعين بافكار يتفق معنا فيها ناس قليلون ويختلف معنا فيها ناس اكثر فيجب ان نبحث على نقط الالتقاء ونقويها ونعرف نقاط الاختلاف ونحاول نوصل فيها لتقارب الى اكبر حد ولو لم نتفق مطلقاً، خلاص يبقى كل واحد حر بس مينفعش ان انا افرض افكارى او ارائى علي الباقى ويا كده يا بلاش ... لو لم نغير هذا الاسلوب فى الحوار يبقى لو مسكنا رسول مش رئيس برضه حنعمل مظاهرات واضرابات ولن يتغير الوضع الحالى

انا لا اتوقع تغيير فى طريقتنا نحن الناخبين الفتره القادمه وسنظل نهاجم كل المرشحين الذين لا ندعمهم بأمل ان هذا يساعد مرشحنا ولكن انا اكتب هذا الكلام واتمنى ان يصل الى المرشحين للرئاسه وان يتغاضوا عن الاختلافات بينهم ويتحدوا ضد رجال النظام القديم ليس لمصلحتنا نحن بل احتراماً لدماء وارواح اخواتنا اللى ضحوا بارواحهم وبيوتهم واسرهم وأولادهم واعينهم، ضحوا بكل ما يملكونه ...
فما أغلى عندك من ابنك او بنتك كى تيتمهم وهم صغار وفى اشد الحاجه اليك ...
و ما أغلى عندك من سماع نحيب امك وابوك وزوجتك وهم يتقطعون حزناً لفراقك ...
هؤلاء ضحوا بكل ذلك فى مقابل ما هو اغلى ... انها """مصر""" وطنا وبلدنا التى تستحق منا اكثر من ذلك بكثير

اتحدوا يرحمكم الله

شريف نبيل
14 مايو 2012

أبلاكاج خشب الله

"كان للفراعنة إله قرد وإله تمساح

وللإله كهنة وحرس يقف بسلاح

وخزنة مقفولة بالضبة وبالمفتاح

وقصر يشبه قصور الجمهورية براح

يا عيني ع الآلهة بقوا فرجة للسياح"

تميم البرغوثي

أيقن أعضاء الفريق الطبي الذي أتى به الديوان الرئاسي سراً بأنهم أمام معجزة طبية بكل المقاييس. لقد كانوا أمام حدث جلل لم تقو حواسهم على تصديقه ، فمنهم من خر ساجداً لله عز وجل وأن كان ممن قبل لمن الملحدين ، ومنهم من وقف مشدوهاً فاغراً فمه ترتسم على وجهه علامات البلاهة والبلادة. فما كان لأحد من الموتواجدين بتلك القاعة شديدة الخصوصية أن يجرؤ على مجرد التفكير في شيء كالذي يراه الآن ماثلاً نصب عينيه.....

********************

كان في أوج قوته وعنفوانه قبل أيام بما لا يتناسب مع سنوات عمره الذي تجاوز التسعين. ربما كان يستمد تلك القوة من طول بقائه في سدة الحكم وانعزاله عن معاناة شعبه (التي كان المتسبب الأول فيها ) مقارنة بأقرانه في لدول التي تحترم شعوبها يغزو الشيب رؤوسهم لتحملهم أعباء مسؤولياتهم كاملة. كانت صدمة رهيبة بالنسبة له أن يخرج عليه شعبه بطول البلاد وعرضها معتصمين في الميادين المختلفة مطالبين بسقوطه ورحيل نظامه. لم يعتد مثل هذا التصرف من شعب تقول التقارير الأمنية بأنه في قمة الرضا عن أحواله وعن نظام حكم رئيسه المفدى الذي لا يأتيه الباطل من بين يديه ولا من خلفه. كان أقصى ما يمكن أن يتوقعه ان تخرج "قلة مندسة" قوامها بضع مئات يجأرون بالشكوى من سوء الأوضاع المعيشية فيتركهم بضعة أيام ثم يخرج عليهم بخطابه العاطفي المعتاد وكلامه المعسول ووعوده البراقة كي يمتص غضمهم فيعود معظمهم من حيث أتى ومن يتبقى يتم ضربه وسحله واعتقاله وتنتهي القصة عند هذا الحد. لقد كانت الأوذاع تحت السيطرة فما الذي جد لكي يفلت زمام الأمور من أيدي آلاته الأمنية الباطشة. ويكأن نصف ميزانية دولته التي كان يخصصها للأمن لم تكن لتحميه من هبة شعبية كهذه. ويكأنه حشوده الأمنية لم تكن سوى أعجاز نخل خاوية وها هي ورقة التوت الأخيرة التى كانت تداري سوءته تسقط عنه هي الأخرى بفعل الجماهير الغفيرة التى اكتظت بها المبادين من حيث لا يدري ولا يحتسب فطفق يخصف على حسده من مما تبقى من أوراق نظامه كي يداري عورته فاستدعى وزارته بكامل هيئتها إلى اجتماع فوري لعلهم يجدون له مخرجاً من هذه الورطة...

********************

كان الصمت قاتلاً ولم يقو أحد ممن حضروا الاجتماع على أن يرفع عينيه في مواجهة الرئيس. (وكأنه كان بإمكان أحدهم أن يفعلها في ظروف مغايرة!!) خيم الوجوم على قسمات وجه الرئيس وقد كاد يجن ، ثم بدا وكأنه يحدث نفسه أثناءدورانه داخل الغرقة بطريقة هستيريه

ماذا حدث؟ ما عهدت شعبي ساخطاّ بهذا الشكل. لقد كانوا مستكينين وكأن على رؤوسهم طيور العالم بأسره فماذا جرى لهم؟ ما كل هذه الحشود التي أراها على شاشة التلفاز؟ ما كل هذا التحدي والإصرار على المكوث في تلك الأجواء شديدة الصعوبة حتى تتحقق مطالبهم؟ ثم ما هي مطالبهم؟ الا يحمدون الله يصلون له آناء الليل وأطراف النهار ان حباهم برئيس مثلي لم يهرب من تحمل مسؤوليتهم وقرفهم تلك السنين الطوال؟ أيجحدوت فضلي في استقرارهم وعدم جرهم إلى حروب هوجاء كما فعل أسلافي؟ من اين لهم هذا الجبروت والعناد الذي كنت اتباهى بانني حاصل على درجة الدكتوراه فيه فإذا بهم يعلنونها صراحة بأنهم حاصلون على نوبل في الصبر؟ ياللسماجة؟ ويظنون أنفسهم ظرفاء و"أبناء نكتة"!! ما هذا الهراء؟ كيف أفرق هؤلاء الملاعين بعد فشل نظرية الطبول لتي تجمعهم والعصا التي تشتت شملهم؟ لقد جربت فيهم كل شيء... ضربتهم بالرصاص الحي والمطاطي والقنابل المسيلة للدموع والمحرمة دولياً فلم يرتدعوا. أطلقت عليهم قناصة مرتزقة فلم يبالوا.. بعثت لهم بقوافل من رجالي يقتحمون عليهم تمركزهم بالخيل والبغال والحمير والجمال فلم يتزحزحوا قيد أنملة. أخرجت لهم البلطجية والمجرمين من السجون كي يبثوا الرعب في قلوبهم وقلوب المتعاطفين معهم فلم يفت ذلك في عضدهم. سحب كل أفراد الأمن من الشوارع ومن كل المرافق الحيوية كي أحولها إلى فوضى عارمة يستعطفونني بعدها أن أرحمهم فإذا بهم يشكلون لجاناً شعبية لحماية ذويهم. أضرمت النيران في المنشآت فاستبسلوا في إطفائها. ارسلت اهم من يقذفهم بقنابل يدوية ولكن دون جدوى. فجرت كنيسة هنا وهدمت مسجداً هناك كي أشعل نار الفتنة تأكل الأخضر واليابس فلم يترددوا في تكوين حوائط من دروع بشرية لحماية بقية دور العبادة. أطلقت عليهم رشاشات المياه الساخنة تارة والمثلجة تارة أخرى حتى وهم يصلون فاستقبلوها بصدر رحب (أو ربما طاروا بها فرحاً فقد مضى عليهم زمن طول دون ان يستحموا !!) أطلقت طائرات استطلاع على ارتفاعات منخفضة تجوب مناطق تمركزهم فإذا بهم يتضاحكون ويتهمونني بالجنون. أطلقت السيارات الطائشة والمدرعات المرتبكة تعيث فيهم دهساً وقتلاً وترويعاً فما زادتهم إلا عزيمة وإصراراً. أطلقت عليهم كل حدائق الحيوان في البلاد تقض مضاجعهم فانسوا إليها واستأنسوها. فطعت عليهم كل سبل الاتصالات فإذا بذويهم ينزلون إلى الشوارع والميادين تقصياً لأخبارهم  فتزداد الأعداد المرابطة في الشوارع. حندت آلتي الإعلامية كلها ضدهم تتهمهم بأبشع الاتهامات من دعارة ومخدرات وخيانة وعمالة للخارج وتلقي أموال ووجبات فانقلب عليَّ السحر سخرية وتنكيتاً وتبكيتاً وأوعزت إلى الإعلام أن يستعدي عليهم أقرانهم الجالسين في المنازل كي يخرجوا عليهم ليلقنوهم درساً لا ينسونه فإذا بأولئك ينضمون إليهم في تلاحم عجيب. أرسلت إليهم جيشي وخط دفاعي الأخير كي يبيدهم عن بكرة أبيهم ويسويهم بالأرض فاحتضنوه. أقلت الحكومة وأتيت بغيرها فلم يعرني أحدهم أي اهتمام. حاولت استدرار عطفهم عليَّ فأقسمت لهم أنني لن أترشح لفترة تالية وانني أريد أن أن أموت في بلدي فلم تجد هذه الألاعيب معهم نفعاً. لم يشفع لي لديهم تاريخي العسكري المشرف ودفاعي عن أرض الوطنفي يوم من الأيام بل ويتهمونني الآن بالتربح والسرقة! أرسلت إليهم العقلاء كي يقنعوهم بمكوثي على رأس عملي إلى أن تنتهي فترتي الرئاسية ثم أسلم السلطة بعدها فلم يقبلوا.. يبدو أن أحد الخبثاء قد سرَّب إليهم انني كنت أراوغ حتى أستجمع قوتي ثم أبطش بهم جميعاً كي أجعلهم عبرة لمن لا يعتبر. (وكأنهم لم يفطنوا إلى ذلك من تلقاء أنفسهم!!) دفعت بمظاهرات مؤيدة لي في ميادين أخرى فلم تؤت أكلها. لقد فلت زمامهم ولم تعد ترسانتي الأمنية قادرة على كبح جماحهم ولا على الحفاظ على نظامي والإبقلء على عرشي . كيف أتخلص من هؤلاء الأوغاد الذين امتلأت بهم الميادين والشوارع والأزقة خاصة بعد أن تخلت عني الدول الكبرى التي كنت أكبر داعم لها ولمخططاتها في المنطقة؟

********************

حاول رئيس الديوان أن يلملم شتات شجاعته التي نجحت الصدمة في بعثرتها وذهب لكي يلقي نظرة عن قرب للمشهد الذي أفزع القصر الرئاسي كله بينما ظل أعضاء الفريق الطبي واقفين على مبعدة من وسط الفاعة راح الرجل يتحسس جسد الرئيس الذي بدا وكأنه جثة هامدة... ضغط على قلبه فلم يستجب... حاول قياس نبضه فلم يجد له نبضاً ... حينها تيقن من الحقيقة التي كان لا بد أن يعترف بها وهي أن الرئيس قد مات... مات؟ هكذا؟ بكل بساطة وهو الذي كان على يقين بأن الرئيس لن يدركه الموت أبداً ليس لأنه مخلد بل لأن الله لا يريده إلى جواره! وماذا يفعل الله بشخص كهذا إلى جواره؟! استغفر الله العلي العظيم من كل ذنب عظيم لقد نجح ذلك الرئيس السرمدي الملعون في أن يكفر شعباً بأكمله حتى أقرب الناس إليه!! هذا ما كان يدور بخلده وهو يحاول التفحص في "جثة" الرئيس. حاول بحرص شديد أن يرفع "الجثة" من على كرسي الرئاسة وهنا تلقى الصفعة الثانية.. إن الجثة لا تتحرك. حاول تقليبها يمنة ويسرة فإذا بالكرسي يتحرك معها اينما حاول توجيهها. هنا قرر الفريق الطبي إنهاء حالة الجمود وتدخل لمحاولة مساعدة ريس الديوان في فصل "جثة" الرئيس عن كرسي الرئاسة وبذل الجميع في ذلك جهوداً خارقة باءت كلها بالفشل الذريع. بدا لهم وكان "الجثة" قد التصقت بالكرسي بشكل لافت للنظر وكان الحل الوحيد هو انضمام فريق من علماء الأنسجة إلى الفريق الطبي وقد كان وأخذوا عينة من "الجثة" لتحليلها وكانت نتيجة التحليل مذهلة بكل ما تحمله الكلمة من معنى.

********************

كانت نتيجة التحليل عصية على التصديق لولا أنها كانت تحمل التفسير المنطقي الوحيد للمشهد الماثل أمام أعينهم.

"إننا بلا شك أمام معجزة علمية غير مسبوقة... فمن الثابت علمياً أن حثة المتوفى تبدأ في التحلل بعد ساعات من وفاته ولكن أنسجة الرئيس لم تظهر عليها أية بوادر لعملبة التحلل. ولكن ثمة ما هو أغرب.. لقت بلغت درجة التماهي بين خلايا جسد الرئيس وخلايا جذع الشجرة المصنوع منه كرس الرئاسة مبلغاً ذابت معه كل الفوارق بين الجماد والإنسان فأصبح كسد الرئيس وكرسيه الرئاسي وكأنهما من نسيج واحد ومن ثم كانت صعوبة الفصل بين جسد الرئيس والكرسي الرئاسي. إنها حقاً لظاهرة تستحق الدراسة"

كانت تلك هي النتيجة التي خلص إليها التقرير الذي أعده فريق علماء الأنسجة المصاحب للفريق الطبي عن نتيجة تحليل أنسجة "جثة" الرئيس. يا إلهي وكلأن هذا التقرير قد جاء ليكسب الوصف الشعبي الذي أطلقه الشعب على رئسه بأنه "ميت ع الكرسي" و "ماسك في الكرسي ومتبت" أبعاداً ومعان جديدة تماماً

********************

"الراجل مات متخشب ايه الحل بقى دلوقتي؟ حانعمل فيه إيه؟"

كان هذا السؤال هو محور الاجتماع الوزاري الطاريء الذي عقده رئيس الوزراء بعد قراته للتقرير الصادم. كيف يمكن أن يعلنوا ذلك الخبر على الشعب؟ كيف سيتقبله شعب ساهموا في تجهيله عن عمد طيلة السنين الماضية سواء بالمساهمة في رفع نسبة الأمية عن طريق زيادة تكاليف الدراسة بحيث لا يتحملها الفقراء أو عن طريق تعليم مهتريء في المدارس والجامعات لأولئك الذين كانوا أسعد حظاً بمقدرتهم على تحمل نفقات التعليم الحكومي؟ المشكلة هنا لا تكمن لا تكمن في طبيعة الورطة بقدر ما تكمن في طبيعة الحل ؛ فلما كانت طبيعة الورطة تفوق حدود الخيال كان لزاماً على الحل أن يكون أيضاً على نفس المستوى. هنا تكمن المشكلة فقد كانت آفة الحكومات المتعاقبة في البلاد افتقارها للخيال وعدم قدرتها على التحرك دون توجيهات فعندما حاولت اتخاذ قرار منفرد لأول مرة في التاريخ جاءت كل الأفكار منافية لأبسط قواعد المنطق وبعيدة كل البعد عن طبيعة الشعب الذي لم تفكر ابداَ تلك الحكومات في النزول إليه والتعرف على رغباته. لعل أكثر تلك الحلول المقترحة شططاَ هو أن تحرق "جثة" الرئيس بالكرسي الذي تعتليه  وأن يعلن على الشعب   أن رئيسه كان قد اعتنق الهندوسية أو البوذية في أواخر أيامه وأوصى بحرق جثته والاحتفاظ بلرماد في زجاجة توضع بالمتحف الوطني. هنا ثارت ثائرة المفتي الذي لم تهتز شعرة من راسه إزاء انتهاك رئيسه لكل المواثيق والأعراف والأديان أثناء فترة حكمه بل كانت وظيفته تفصيل الفتاوى على مقاس الرئيس ونظامه كي يضفي عليها قرارتهم الشرعية الدينية. وعلى الرغم من ذلك فقد كانت وجهة نظره لا تخلو من الوجاهةحيث قال بأن الشعب متدين بطبعه (مهما اختلفنا أو اتفقنا على تفاوت درجات ذلك التدين من شخص لآخر) ومن ثم فمن الصعب عليه أن يتقبل فكرة أن يعتنق حاكمه الذي دائماً ما كان يوصف في إعلامه الرسمي بالـ"مؤمن" ديانة أخرى غير ديانة الأغلبية فضلاً عن كونها ديانة غير سماوية. استمرت المداولات أياماً طوالاً وكانوا قد اتفقوا على استحالة دفن الرئيس على هذه الوضعية في حين لم يكن الشعب يعلم من أمر رئيسه الذي طالب بإسقاطه شيئاً. واكتفى الإعلام ببث رسائل وأحاديث مسجلة مع الرئيس وأحاديث مباشرة مع مختلف الوزراء إلى حين إيجاد حل يخرجهم من ذلك المأزق.

********************

أخذ المرشد السياحي يتجول بالأفواج التي يشرف عليها في الميدان الرئيس الذي شهد تلك الأحداث الجسام وكانت الحياة قد عادت إليه مجدداً وانتعشت السياحة وعادت عجلة الإنتاج إلىسابق عهدها وأكثر كي تعوض التأخبر بالرغم من أن كل المؤشرات في تلك الفترة كانت تنذر بكارثة محققة. ولا غرابة في ذلك فإن للشعوب قدرة عجيبة على تضميد جراحها واستعادة إرادتها المسلوبة والنهوض من جديد وتسطير صفحات مجيدة بأحرف من نور تحكي معجزات من صنع بشر. أخذ المرشد يشرح للسياح كل شبر في ذلك الميدان الذي أصبح مزاراً يؤمه كل محب للبلاد ومنبهر بحضارتها. بعدها اتجه بهم نحو منتصف الميدان حيث أقيم نصب تذكاري للشهداء الأبرار الذين سقطوا على أيدي قوات الأمن في سبيل كلمة حق في وجه سلطان جائر

"لهذا النصب التذكاري حكاية يعتبرها من لم يعاصرها ضرباً من ضروب الخيال"

وقص عليهم قصة النهاية العجيبة التي انتهى عليها الرئيس السابق ثم أضاف:

"بعدها قام لجيش ببناء قاعدة رخامية زسط الميدان ثم جيء بهذا النصب التذكاري مغلفاً بعناية فائقة بحيث لا يشي بما بداخلهةواستطاع إقناع الشعب بطريقة ما بألا يزيح أحد الستار عنه باعتباره هدية من القوات المسلحة إلى الشعب العظيم وثورته المجيدة. إلى أن جاء اليوم الموعود الذي دعا فيه الرئيس الجديد المدني المنتخب الشعب إلى حفل تأبين لشهائه الأبرار. وفي الموعد المحدد احتشد الناس وجاء الرئيس الجديد بصحبة قادة الجيش ليشارك الشعب في تأبين شهدائه وقام بنفسه بإزاحة الستار عن تلك الهدية الغامضة التي لم تكن في حقيقتها سوى صندوق زجاجي تحتوي على "جثة" الرئيس "المتخشب" وعلى الزجاج نقوش وزخارف تخمل على امتداد الأوجه الأربعة الآية الكريمة

بسم الله الرحمن الرحيم{قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء بِيَدِكَ الْخَيْرُ إِنَّكَ عَلَىَ كُلِّ شَيْءٍ قَدِيرٌ }صدق الله العظيم.

 ********************

ملحوظة: كتبت المسودة الأولى لهذه القصة في يناير 2011 ثم أعدت كتابتها ثانية في أبريل 2011 ثم أعدت كتابتها للمرة الثالثة في يناير 2012 وها هي المرة الرابعة في أبريل 2012.

            

حوار بين ثوري وشفشقي

حملة شفيق للمعارضه: الفريق شفيق مش فاضي يرد على الأطفال

قام الكاتب الصحفي والأكاديمي الأستاذ محمد فتحي مشكوراً برتوته (عمل ريتويت) لرابط صفحة حملة دعم أحمد شفيق رئيساً للجمهورية على الفيسبوك. وكانت الصفحة مشكورة أيضاً قد فتحت الباب لكل من لا يزال غير مقتنع بالرجل أن يدلي بدلوه ويتولون هم الرد عليه. ظننت الصفحة -وإن بعض الظن إثم- تحاول فتح مجال حقيقي للحوار كما يشير رأس الموضوع

ولذلك فقد أدليت بدلوي وسألت كل اللي في نفسي بصراحة وانا كنت شايل ومعبي ودار الحوار التالي: (تركت الأخطاء المطبعية كما هي لغرض في نفسي)

العبد لله:

1- أحمد شفيق كان رافض يعترف بالثورة وكان رافض حتى اللفظ وكان بيسميها احتجاجات وبعد ما أعلن ترشحه بقى بيقول ثورتنا. مش دة برضه يعتبر نفاق وانتهازية سياسية ومغازلة أصوات؟

2- في لقائه الشهير مع علاء الأسواني لما الأس...واني سأله معقولة انت مكنتش تعرف ان فيه فساد في الوزارة لما كنت وزير؟ رد قال له: مليش فيه يا علاء. انا وزير تكنوقراط بعمل شغلي ومليش دعوة بغيري (الكلام دة وهو لسة رئيس وزرا) وبعدين لما أعلن ترشحه طلع وقال انه كان منضم لجبهة من الوزراء في حكومة أحمد نظيف كانت معترضة على السياسات الفاسدة في الوزارة (يعني كان يعرف ان فيه فساد) السؤال بقى: أصدق انهي شفيق فيهم؟ شفيق الوزير التكنوقراط اللي ملوش فيه يا علاء؟ ولا شفيق عضو تنظيم الوزراء الأحرار في حكومة نظيف؟ والسؤال التاني (وهو الأوقع): البني آدم اللي مش قادر يثبت على رواية واحدة محددة لموقف اتخذه في المادي نسميه ايه؟

3 - ليه أحمد شفيق في كل حواراته بيدي ناس كتير الإحساس بإنه ما بيجمّعش؟

4- اللي بيقول الوزير المشاكس: هو كان بيشاكس في مين دة مفيش حد مكن الوزرا الا وبيقول بناء على توجيهات السيد الرئيس ولما السيد الرئيس اتخلع وبقى شفيق رئيس وزرا كان بيقول هما في المجلس الأعلى للقوات المسلحة قالولي ولما أعلن ترشحه قال انا استأذنت المشير يعني الأخ ماشي بمبدأ سمنا وأطعنا غفرانك ربنا وإليك المصير لكل من في إيده السلطة العليا طب لما يبقى هو السلطة العليا حيفضل برضه يستأذن المشير؟ وبالمناسبة إيه وضع المشير لو شفيق مسك الحكم؟ وهل صحيح انه عدم قدرته على الإجابة على نفس السؤال لما اتسأله في قناة البي بي سي خلى مدير حملتة ياخد التسجيل من القناه عنوة ويمنع عرضه؟
5- هو مش أحمد شفيق انته بتقولوا انه مدني وانقطعت صلته بالعسكرية اللهم إلا المعاش اللي بياخده من العسكرية (بالمناسبة هو لو مسك الرئاسة حيفضل برضه ياخد معاشه العسكري زائد مرتب الرئيس؟) ليه مصرين انكم تفضلوا تنادوه بسيادة الفريق (وتفكروا الناس بخلفيته العسكرية في وقت الناس بيقولوا يسقط حكم العسكر اللي فضل 60 مجابلناش الا الوضع المنيل اللي احنا فيه) مش الأولى انكم تنادوه بلقبه المدني وهو د. أحمد شفيق؟ (هو مش معاه دكتوراه برضه ولا أنا بيتهيألي؟)
6- يقصد إيه أحمد شفيق لما قال انه لا يسعى لمنصب قيادي بترشحه رئيس ؟
7- اللي بيقول انجازات أحمد شفيق في مصر للطيران ووزارة الطيران المدني (محدش يقدر ينكرها) والمطارات اللي طورها بس تعالوا نحللها هي ايه المطارات اللي طورها؟ مطار القاهرة (دا مطار العاصمة وواجهة البلد واللي بيستقبل فيه الرئيس الوفود الرسمية) ومطار برج العرب (اللي كان مطار عسكري وبعدين بقى مطار مدني وبيستقبل فيه الرئيس ضيوفه لما كان بيبقى في استراحته الصيفية في برج العرب أو في قصر رأس التين وبالمناسبة على حد علمي التوسعة الجديدة لم تفتتح في عهد شفيق بس لا ننكر جهوده فيها) ومطار شرم الشيخ (الدلع كله دي كانت بلد الرئيس واللي بتنعقد فيها كل المؤتمرات ) ومطار مرسى علم (بتاعة الهليبة الكبار من صحاب ولاد الريس) يعني كان تركيزه في كل المطارات اللي كان مبارك وألاضيش ابنه بيستعملوها انما بقى أخبار باقي المطارات ايه؟ مطار النزهة في اسكندرية (دكان)، مطار الأقصر (دكان) ، مطار أسوان (دكان)...إلخ وبمناسبة وزارة الطيران ومطار القاهرة أخبار ال 42 بلاغ اللي متقدمين في شفيق إهدار مال عام ومتصورين فيديو؟ محدش يقول لي النائب العام حفظها لما ملقاش عليه حاجة وهي بلاغات كيدية لإننا كلنا عارفين ان النائم العام بتاعنا مش نزيه وشغال عبد لمأمور ادبح يازكي قدرة يدبح زكي قدرة!!
8- موقعة الجمل أحمد شفيق ومحمود وجدي مسؤولين عنها مسؤولية سياسية حتى لو مش مسؤولين عنها مسؤولية جنائية محدش حقق معاهم ليه (وبرضه محدش يجيبلي سيرة النائم العام) ولما طلع أحمد شفيق اعتذر (كتر خيره برضه يشكر) ووعد انه حيحقق فيها؟ محقش فيها ليه؟ وإيه علاقته هو ومرتضى منصور باختفاء ملف موقعة الجمل من المحكمة باعتبار منصور متهم فيها جنائياً وشفيق ووجدي متهمين فيها سياسياً؟
9- بم تفسر عدم بدء أمن الدولة بفرف ونقل المستندات الهامة إلا بعد ترك شفيق لمنصب رئيس الوزراء ومجيء عصام شرف (اللي عرفنا بعد كدة انه سكرتير للمجلس العسكري زيه زي شفيق والجنزوري بعدهم)
10- اللي بيقول شفيق حارب في 73 باقي المرشحين عملوا إيه: هو لازم كل رئيس يجيلنا يبقى عنده حاحجة بيذلنا بها؟ مبارك بيذلنا بالضربة الجوية وشفيق بيذلنا بالمطار وبإنه حارب في 73 وكإنه مكانش بيأدي عمله لأ دة دة كان بيجبّي علينا؟! وبمناسبة الحرب مسمعناش ليه أي اعتراض منه على بقاء الفريق سعدالدين الشاذلي في المنفى أيام مبارك؟ مسمعناش ليه منه أي تعليق على تجاهل بطولات الفريق سعد الدين الشاذلي ودوره في حرب أكتوبر وانتزاع صورته من كل صور الحرب وحتى تجاهل ذكر اسمه ودوره في بانوراما حرب اكتوبر؟ ليه محاولش يرد اعتباره قدام الإعلام وقفتها؟ مش بتقولوا انه وزير مشاكس؟ هو مش الفريق سعد الدين الشاذلي كان برضه بيحارب في 73؟

وبصراحة لم أكن أتوقع ان يأتيني رد ولكنه جاء

الأخ المناضل:

الرد على Ahmed Abdel Hadi ... 1 هو مين ده اللى بيجمعش فى كلامه و اتكلم عن وجهه نظرك انت بس و متقولش الناس شايفة كذا و كذا .... 2 - ياريت تجيب الفيديو اللى بيقول فيه انه استأذن من المشير لأنه طلع فى كل البرامج و قال ان الكلام ده محصلش و يا...ريت تبطل فبركة و تأليف و لو مش فاهم حاجة متتكلمش فيها .... 3 - ايوه معاه دكتوراه بس برضه حنقوله يا سيداة الفريق ... ايه اللى مضايقك يعنى لما نقوله كده هى حاجة وحشة ده منصب يتشرف اى حد بيه و و اللى بيقول حكم العسكر هما مش مصر كلها و هما اللى جابوا 20 % فى الاستفتاء و مش عشان نرضى الاقلية حنغير لقب الفريق ... 4 - يقصد انه مش جى طمعان فى المنصب عشان يكسب من وراه لكن عايز يخدم البلد و لو انت مفهمتش القصد من التصريح فدى مشكلتلك انت ... 5 - المطارات الجديدة على اعلى مستوى و المطارات دى معمولة عشان السياح و الاجانب اللى جايين من برة يشوفوا امكانيات مصر مش معمولة زى ما بتألف و بتقول عشان مبارك و جمال و رجالتهم و المطارات القديمة كان بيتم تطويرها و لو انت شايف ان النائب العام مش كويس فدى برضه وجهه نظرك و متقولش كلنا عارفين و اتكلم عن نفسك بس و دايما اللى بيقول كلنا عارفين و الشعب يريد بيبقى واحد مش فاهم حاجة و بيتكلم و خلاص لأن النائب العام راجل محترم و شايف شغله كويس 6 _ مسئولية سياسية ايه هو اى كلام و خلاص ... ايام موقعة الجمل مكنش فى شرطة فى الشارع يبقى ازاى بتسأل شفيق و وجدى و الجيش مش بيتحرك الا بأوامر من القائد الاعلى للقوات المسلحة اللى هو ساعتها كام مبارك ... يبقى ايه اللى حشر شفيق و وجدى ... كنت عايزهم ينزلوا يقفوا فى الميدان مثلا و لا اى كلام و خلاص ... و بعدين ايه اختفاء ملف موقعة الجمل اومال اللى بيتحاكموا دلوقتى دول بيتحاكموا ازاى من غير ملف قضية ... مش عارف انت جايب كمية التأليف دى منين ... ما شاء الله خيالك واسع جدا .... 7 - طب لو زى ما بتقول ان شرف كان زى شفيق ... طب امن الدولة بدأ بفرم المستندات ليه طالما مفيش خوف من اللى جى بعد شفيق !!!! 8 - الفريق سعد الدين الشاذلى كان حيتسبب فى كارثة ايام حرب اكتوبر كانت حتضيع الجيش و ده سبب عزله من منصبه و ده كلام جيهان السادات ... تفتكر بقى المفروض ندافع عن واحد كان حيضيع الجيش !!!! بقولك طالما مش فاهم حاجة متتكلمش فيها ... بالمناسبة الماضى بتتكتب كده مش بتتكب المادى

أعجبت انا بصراحة بمصادر معلوماته الموثقة. وبعدين رد عاتشيفي عاتشيفي بصراحة. انا عن نفسي مسكت الدمعة اللي كانت حتفر من عيني وحدفتها م الشباك (الدمعة مش عيني) ورحت ناتع الرد دة

العبد لله:

الرد على ------:

1- لو كنت ركزت في كلامي أنا كلامي دقيق أنا قلت ناس كتير مقلتش الناس وبالتالي ملمحتش حتى اني باتكلم عن الناس كلها فلو انت مفهمتش دة تبقى مشكلتك مش مشكلتي. وعموماً في السياسة المرشح المفروض يوصل لمعارضينة لإنه مؤيدينه... حيأيدوه في كل احالات مهما عمل والمفروض انه مترشح عن مصر كلها مش عن فئة مؤيدينه بس إذا كان ناس كتير من معارضينه اللي واصلهم من لقاءاته انه ما بيجمعش يبقى دي حاجة المفروض الحملة بتاعته تدرسها وتحاول تقف على أسببها وتعالجها دي نصيحة مش أكتر ودة مش عيب. في العالم كله فيه حاجة اسمها Political Image Making يا ريت تفكروا تستعينوا بيها. أنا كناخب محتاج أشوف أحسن ما عند المرشحين عشان أعرف اختار.
2- انت مرديتش على أهم سؤالين السؤال بتاع تغير موقفه من الثورة من الرفض التام إلى التأييد التام والتحدث باسمها وما يعتري ذلك من شبهة نفاق وانتهازية سياسية ومغازلةو أصوات والسؤال بتاع عدم قدرته عاى الثبات على رواية واحدة لموقف اتخذه في الماضي (بالضاد أهو عشان ما تزعلش حاكم فيه مثل بيقول لك: يا با علمني الهيافة قال له تعالى في الهايفة واتصدر!!)
3- مرديتش على سؤال علاقته بالمشير حتكون إيه وإيه وضع المشير لو نجح في الانتخابات وعلى الاتهامات اللي بتوجه لمدير حملته بإنه صادر شريط لقاؤه بالبي بي سي لما معرفش شفيق يجاوب إجابة عدلة على نفس السؤال. ومرديتش على سؤال لو نجح برضه حيفضل ياخد معاشه العسكري زائد مرتب الرئيس ولا إيه؟
4- أنا ما بألفش ولو انتو كحملة دعاية مش عارفين تعملوا Tracking عدل لكل الكلام اللي بيقوله مرشحكم تبقوا حملة فاشلة وحتضروه مش حتنفعوه مهما كان عدد التوكيلات اللي عرفتوا تلموهاله ولو كانت دي طريقتكم في الرد على الانتقادات يبقى عليه العوض في الراجل في الانتخابات . وعموماً راجعوا لقاؤه مع لميس الحديدي اللي كان بيحاول فيه يتهرب من انه يعترف بطريقة مباشرة انه استأذن المشير.
5- انتوا كل ما بنقول ان شفيق رئيس عسكري بتقولولنا دة مدني وعلاقته انتهت بالعسكرية ومع ذلك مصرين تنادوه بالفريق شفيق يعني قمة التناقض ودة حيأثر بعد كدة في الدعاية. نصيحة كونوا متسقين مع نفسكم أنا بشكل شخصي مش مزعلني انكوا تنادوه بسيادة الفريق بس في المقابل تعترفوا انه رئيس عسكري ومتسوقوهوش على انه رئيس مدني. أما الخدمة العسكرية في حد ذاتها خصوصاً في حرب زي حرب أكتوبر شرف ليه ولكل مصري بس من غير ما يتاجر بيهاظ؟ منفعتش اللي قعد يتاجر بضربته الجوية 30 سنة! أما بخصوص يسقط حكم العسكر قارنوا الأعداد بتاعة عكاشة وسبليدر وعمرو مصطفى اللي بيقولوا (نعم لحكم العسكر ونعم للمجلس العسكري) وأعداد الناس اللي في الميادين بتقول (يسقط حكم العسكر) وبعدين نتكلم واسأل حضرتك أي خبير اقتصادي حيقول لك مفيش دولة متقدمة محكومة بحكم عسكري والدول القليلة الاستثناء بتؤكد القاعدة مش بتضعفها).

6- أنا مكنتش أقصد حاجة بالسؤال عن قصد احمد شفيق بإنه بتصريحه انه مس بيسعى لمنصب قيادي حتى بالأمارة لم أعلق تعليقاً تهكمياً عليه بالعكس انا كنت فعلاً عاليز أعرف قصده ولو انت مفهمتص قصدي تبقى مشكلتك مش مشكلتيز
7- المطارات اللي بتقولوا ...انها على مستوى عالمي متبصوش بس على التصميم المعماري بصوا عكمان على التنظيم والإدارة وشوقوا مطار فرانكفورت ومطار شارل ديجول ومطار زيوريخ وحتى مطار دبي وشوفوا كمية الرحلات وال connections اللي عليهم وقارنوها بمطاراتنا وبعدين اتكلموا. أما بخصوص المطارات التانية مشفناش يعني عندنا في اسكندرية مطار النزهة حصل له اي تطوير اللهم إلا ترميم بس وكذلك مطار الأقصر وأسوان ولا دول مبيجيلهمش سياح؟ بطلوا مكابرة بقى واوزنوا الكلام قبل ما تقولوه. أي مطار في أي حتة في بلد معينه هو واجهة للبلد دي مينفعش اهتم بمطارات معينة واهمل مطارات تانية وعموماً ورونا أدلة على التطويرات في بقية المطارات يمكن انتوا شايفين حاجة احنا مش شايفينها.
8- طبعاً لازم يكون النائب العام بالنسبالكم شايف شغله كويس طالما ما بيهوبش ناحية شفيق بتاعكم لكن انتوا لو تابعتم بدون انحياز حتعرفوا النائب العام دة شكله ايه وليه ناس كتير بتطالب بإقالته.
9-هو رئيس الوزرا ووزير الداخلية مش مسؤولين؟ شراريب خرج يعني؟ مسؤولية القائد الأعلى للقوات المسلحة والشرطة لا تلغي مسؤولية الوزير ورئيس الوزرا ولو وزير الداخلية ملوش حكم على ظباطه انه يرجعهم يبقى وزير فاشل (دة طبعاً بافتراض جدلي ان انسحاب الشرطة مش متعمد وإنهم مش واخدين أوامر بكدة وسؤال ع الماشي قضية اللوا البطران ايه اللي تم فيها؟ وليه لغاية دلوقتي متكتمين عليها ومش بيحققوا تحقيقات جدية فيها؟)وحد يفكرني كدة باليمين الدستورية اللي حلفها شفيق ووجدي قدام الرئيس (اللي هي نفس اليمين الدستورية اللي الرئس والمشير نفسهم حلفوها)؟ مش هي دي اللي بيقول فيها "أفسم بالله العظيم أن أرعى مصالح الشعب وأمنه"؟ فشل وزير الداخلية ورئيس الوزراء في رعاية مصالح الشعب وأمنه يعتبر حنث باليمين الدستورية ومعلومة قانونية كدة ع الماشي : الحنث باليمين الدستورية يعتبر خيانة عظمى. محدش بقى يقوللي إيه اللي حشر شفيق ووجدي في الموضوع. الموضوع دة بالذات الكل فيه باطل والكل قبض ريح. أما بخصوص اختفاء ملف القضية فدة مش تأليف راجع النائب المحترم عصام سلطان واكلام اللي قاله والاستجواب اللي المجلس جهزه لوزير العدل بخصوص الموضوع وطبعاً وزير العدل محضرش لإنه معندوش حاجة يقولها وياللصدفة الشديدة كان مرتضى منصور امبارح الصبح في مكتب النايب العام هو وعكاشة وصرح الفريق بتاع مرتضى ان الكلام حول موقعة الجمل. محدش يقول لي كلام مرتضى منصور مع عمرو الليثي كلنا عارفين التاريخ المشرف لعصام سلطان والتاريخ المهبب لمرتضى منصور (اللي بالمناسبة عار على القضاء انتماء شخص زي مرتضى ليه مرتضى منصور كبيره عربجي)
10- مجيء شرف كان بالنسبة للداخلية مفاجأة مكانش حد يعرف انه حيبقى مستأنس زي شفيق وإلا مكانوش عملوا اللي عملوه.
11- ما شاء الله حضرتك جايب معلوماتك العسكرية عن الفريق سعد الدين الشاذلي من الفيلد مارشال جيهان السادات دكتوراه في العلوم العسكرية. جيهان لم تعد كونها قرينة السادات وكان بيتفصلها قوانين على مقاسها (وراجع قانون الأخوال الشخصية المعروف شعبياً باسم قانون جيهان) فهي آخر واحدة تتكلم عن الفريق الشاذلي اللي ضفره برقبتها هي وجوزها. ومع ذلك احب انك تسأل الفيلد مارشال جيهان مين السبب في ثغرة الدفرسوار ومين اللي كسينجر قال له لن نسمح بهزيمة السلاح الأمريكي مرتين ومين اللي زعق في وش السادات لإن كان ممكن الثغرة دي متحصلش لولا قراراته اللي كان عايز بيها يجري يستجيب للضغط الأمريكي ويقعد على مائدة المفاوضات بعد ما حقق انتصار شكلي كان ممكن يبقى انتصار كامل لولا قراراته واللي بيها قبل بكل الشروط اللي كان عبد الناصر رافضها من غير حرب. اسألها عن سعد الدين الشاذلي اللي اتقدم ببلاغ يتهم فيه السادات بالخيانة العظمى عشان كان في إيدة يمنع ثغرة الدفرسوار ويحقن دماء جنوده بس معملهاش وعلشان اتفاقية كامب ديفيد المجحفة اللي احنا لية بنعاني من أثرها لغاية دلوقتي. وأهم من دة كلة منين المعلومات دي ان الفريق الشاذلي كان حيوقع الجيش؟
عموماً انا مش بألف انا بتكلم كلام منطقي والمفروض ترد عليا رد منطقي مناظر بس انت فضلت انك ترد رد عاطفي وعشان كدة انا مش عايز الرد منك على الأسئلة العشرة بتاعتي مضافاً إليهم السؤال رقم 11 اللي حقول دلوقتي:
عمل ايه الفريق شفيق بصفته قائد قوات جوية وبعدين مدير لمصر للطيران وبعدين وزير طيران مدني وبعدها رئيسش وزراء في قضية الطيارة المصرية اللي وقعت في أمريكا وكانت بتضم خيرة عسكريينا وعلماءنا؟ ليه لغاية دلوقتي مفتحش تحقيق جاد فيها طول السنين دي؟ وليه ما أعادش فتح التحقيق فيها بعد الثورة؟ ولا دي عشان حتطير فيها رقاب ناس كبار قوي فمش عايز يخش عش الدبابير برجليه؟ ولا يكونش دول كمان كانوا عايزين يوقعوا الجيش فالحمد لله انهم وقعت بيهم الطيارة؟

أنا عايز الرد على 11 سؤال من أحمد شفيق نفسه تاخد بعضك وتروحله وتوريله الأسئلة دي وتجيب الرد منه شخصياً. أنا مواطن وناخب ومن حقي انه يجاوب على أسئلتي. بس يا رب بس بعد ما يشوف الأسئلة ا 11 مايقولكش: ايه؟

فما كان منه إلا أن أدهشني بسرعة بديهته ورده الحاسم فأنا كأحمد انبهرت الحقيقة. انبهرت بتركيزه الشديد على لب الموضوع. الراجل يا جماعة بيدور ع البهريز ومبيضيعش وقته في كلام فارغ بيخش ع البروتين على طول. أنا بصراحة انبهرت لدرجة اني فكرت جدياً اني أغير اسمي في السجل المدني واسمي نفسي مبهور بس لقيت ان مبهور باهر وشهرته البهبوري مش راكبة. فيها بهارات كتير الحقيقة

الأخ المناضل:

الرد على احمد عبد الهادى ... انا كنت ممكن اجاوب على التأليف و التخاريف بتاعتك دى بس اخر سطر ده بيدل على انك طفل او عقليتك عقلية طفل و انا مش مستعد اضيع وقتى فى الرد على طفل و انا الحق عليا انى بعلمك ازاى تكتب ماضى بدل محد يضحك عليك ولا حاجة ... و لمفروض من علمك حرفا صرت له عبدا و انا علمتك كلمة و انت بترد عليا ازاى ... عشان تعرف بس الفرق بينى و بينك

وبعدين يا جماعة الراجل جمايله مغرقاني يا جماعة بيديني معلومات قيمة مش عارف من غيره انا كنت عملت ايه في حياتي يا ربي. طب أرد جمايله ازاي؟ مفيش غير ان انا ارد عليه واقول له:

الرد على -------: أشكرك على رقيك في الحوار وردك يدل على ضعف حجتك لإنك لو لاقي منطق ترد بيه كنت قارعت الحجة بالحجة ومكنتش حولت الموضوع لهجوم شخصي عليا مع ان دة خلاف في رأي سياسي يا من تدعون إيمانكم بالديمقراطية وتقبلكم للنقد وفعلاً اثبت لي بالدليل القاطع انك بتيجي في الهايفة وتتصدر. وعموماً انا قلتلك قبل كدة ان أنا مهتم أكتر برد مرشحك على ال 11 سؤال مع كامل احترامي لرأيك بس أنا من حقي كناخب ان المرشح نفسه يرد على أسئلتي اللي أعتقد إن ناس كتير من غير المؤيدين لأحمد شفيق يحبوا يسمعوا إجابته عليها لإنه محتاج أصوات الناس دي لإنه في النهاية عايز يبقى رئيس مصر كلها مش رئيس مجموعة الشباب الحلوين أعضاء حملته الانتخابية. وخلينيأنا كمان أرد لك جميلك بتعليمي ان الماضي بيتكتب بالضاد (الحفيقة معلومة قيمة مكنتش أعرفها قبل كدة) وخليني اعلمك كام حاجة كدة:

1- فيه اختراع عظيم عرفته البشرية من حوالي 1400 سنة ويمكن أكتر اسمه : "إقرأ" جربه الاختراع دة جميل جداً وحيفرق معاك كتير.
2- خلي أحمد شفيق ياخد الأسئلة ال 11 بتاعتي دي وينزل في مؤتمر صحفي أو لقاء تلفزيوني ويرد على الأسئلة دي خليه يبقى أول واحد من المرشحين اللي يردوا على أسئلة معارضيهم في مؤتمر صحفي وكل المرشحين يعملوا زيه زي ما كان المفروض يكون هدف الصفحة دي إلا إذا كنتوا عاملينها بس عشان تغنوا وتردوا على بعض
3- لو كل فريق العمل في حملة أحمد شفيق الانتخابية بيفكروا بنفس منطقك دة ودي طريقتهم في الرد على معارضيهم يبقى مرشحكم خسران خسران لا محالة.
اتمنالكم حظ سعيد لإن المناظرات اللي المفروض تحصل بين المرشحين حتكون أقوى من كدة بكتير ويا رب تعرفوا تكونوا قدها

وطبعاً لا يكف أخونا عن إدهاشي!! كل أما أقول لا يمكن يبقى في أعاجيب أكتر من كدة اكتشف ان معينه من الأعاجيب لا ينضب.

الأخ المناضل:

الرد على احمدعبد الهادى ..بقى ان حجتى ضعيفة هههههههههههههههههههههههه ده انا بعلمك ازاى تكتب ... و بعدين اديلك مثال على التخاريف بتاعتك عشان انت عايش الوهم و رايحة منك خالص ... فى الاول بتقول ناس كتير اقولك اتكلم بأسمك و متتكلمش بأسم الناس ...تقولى انا بقول ناس كتير مش كل الناس ههههههه ما شاء الله على المنطق و الكلام العاقل الموزون و مين برضه اللى خلاك تتكلم بأسم ناس كتير ما تتكلم عن نفسك بس ... و مثال تانى على سؤالك عن المقصود بتصريح الفريق احمد شفيق انه مش طمعان فى المناصب مع ان التصريح شارح نفسه و اى واحد بيفهم حيعرف ايه المقصود منه لكن انت مش فاهمه و انا فهمتهولك تقوم ترد و تقولى لو انت مش فاهم قصدى تبقى دى مشكلتك ... ه اى تقليد و خلاص .... و بعدين عايز منقولش الفريق شفيق ... انت مالك انت نقول ولا منقولش و لا نقول مدنى ولا عسكرى ... انت مين انت عشان تقولنا نقول ايه و منقولش ايه .. و بعدين عايز الفريق شفيق يرد على اسئلتك ... هو الفريق شفيق فاضى للرد على الاطفال ؟؟؟ و كمان فى واحد عمال يطبل ورا الردود بتاعتك و ما شاء الله ردوده كلها الفاظ خارجة و قلة ادب بس هو معذور لأن كل واحد بيعبر عن البيئة اللى نشأ فيها و عن التربية اللى اترباها و زى ما انت شايف محدش رد بأى لفظ خارج و ده يدل على ان الموجودين ناس محترمين و شوف انت بقى لما ده يبقى الوحيد اللى بيأيدك وبكلامك الطفولى ده يبقى فعلا الطيور على اشكالها تقع

لأ بجد يا جماعة الراجل جمايله مغرقاني من ساسي لراسي ومش عارف أعمل إيه عشان أرد ولو 10^-15 من جمايله دي اللي مش عارف أروح منها فين؟

العبد لله:

الرد على -------:

برافو برافو والله سعادتك أحسن واجهة أي سياسي منافس لمرشحك محتاجها عشان يسقطه. خليني أرد جزء من جمايلك اللي انت مغرقني بيها وأقول لك انك عندك تشويش رهيب في تعريف كلمة المنطق عشان أعالجك لازم أرجع أعلمك لغة عربية من أول ...وجديد وأرجع أعلمك فلسفة ومنطق وأعلمك كمان حاجة اسمها التفكير العلمي وحاجة تانية اسمها القراءة النقدية بس عشان ضيق الوقت والمساحة (أنا عارف ان ورا سعادتك مشاغل كتير مش فاضي للأطفال أمثالي) حعلمك كام حاجة كدة في مباديء علم السياسة:
1- السياسة فيها 3 فرق الموالاه اللي هي سعادتك والمعارضة اللي هي العبد لله والحياد (أو عدم الانحياز) اللي هما الناس اللي مش فارقة معاهم حضرتك او العبد لله أو المرشحين اللي بندعمهم او القضية كلها من أساسه. مينفعش في السياسة اتك في أي مناظرة سياسية تسفه المعارضة وتقول عليهم أطفال لإنك كسياسي محتاج أصوات الناس كلها ولذلك مضظر انك تستحمل كل الانتقادات وترد عليها بالمنطق مهما كانت بالنسبة لك تافهة وغير ذات قيمة أو أهمية لإن الشعب في النهاية هو الحكم. يعني لو حد من الشعب كان عايز ينتخب مرشح معين وبعدين سمع حد من الحملة الانتخابية بتاعة المرشح دة بيقول "معنديش وقت للرد على المعرضة لإنهم أطفال" فكرك كدة البني آدم دة ممكن يدي للمرشح دة صوته؟ طبعاً لأ. وهي دي غلطة نظام مبارك اللي ودته في داهية الاستهانة بالمعارضة وعدم الالتفات للانتقادات مهما كانت بسيطة وتافهة. كمان مينفعش انك تحول خلاف سياسي لخلاف شخصي لإنك كدة بتضعف موقفك قدام الناس وبتدي انطباع قد يكون خاطيء انك معندكش منطق ترد بيه يعني مثلاً مينفعش انتقد موقف سياسي ليك فترد عليا بإنك تنتقد تسريحة شعري أو طريقة لبسي أو لدغتي (لو عندي لدغة)
2- مفيش حاجة في السياسة اسمها اتكلم عن نفسك وبس لإن أي رأي انت بتقوله بينسحب بالضرورة على التيار اللي انت بتنتمي ليه شئت أم أبيت (غير منطقي طبعاُ من الناحية النظرية بس حتعمل ايه هي كدة السياسة) يعني كمثال تبقى غلطان لو افتكرت اتك الكلام اللي انت بتقوله هنا ع الصفحة بيعبر عن وجهة نظر خاصة بيك. لأ يا سيدي الفاضل الكلام اللي انت بتقوله هنا بينسحب عليك وعلى حملة أحمد شفيق وعلى أحمد شفيق نفسه زي بالظبط لما الأخ اللي بيأيدني استخدم تعبيرات غير لائقة وانسحب الكلام دة عليا أنا مع إني مقلتوش وخلاك تحطنا أنا وهو في سلة واحدة وانا تقبلت دة لإن هي دي السياسة. بمعنى آخر ان اللي حيخش الصفحة دي يقدر يستنبط حاجات كتير قوي عن أحمد شفيق وعن أعضاء حملته بل وكمان عن قيادات الصف الأول والتاني اللي حيبقوا معاه لما ينجح (بافتراض طبعاً انه حياخد حد من الحملة بتاعته في مناصب قيادية).
3- مفيش حاجة في السياسة اسمها انا اعمل اللي انا عايزه انت مالك لإنك انت ارتضيت انك تخش لعبة السياسة يبقى تلعبها بشروطها مش بشروطك ومن أهم شروطها انك إي حاجة تعملها أو تقولها حتلاقي اللي يقولك ليه وازاي وانت بتضحك عليا وانت بتستغلني ... إلخ ولازم تقدر دة وتتعامل معاه بحكمة لإن دة قدرك بما إنك اخترت تلعب سياسة.

حاجة كدة ع الماشي بقى على موضوع التقليد فيه حاجة اسمها الكتابة التهكمية أو الكتابة الساخرة من ضمن أساليبها انك انت تستخدم نفس منطوق كلام المنافس بتاعك أو نفس طريقته في إنك ترد عليه وأبرز أمثلة على الكلام دة شعر النقائض بتاع جرير والفرزدق والأخطل. أنصحك انك تستخدم الاختراع اللي قلتلك عليه في الرد اللي قبل دة عشان تعرف أكتر . حتستمتع والله.

حاجة أخيرة وحتكلم المرة دي عن نفسي عشان متزعلش أنا لو كان عندي مثقال ذرة من إيمان بإن أحمد شفيق ممكن يكون عدل بعد المناقشة دي تأكدت بما لا يدع مجالاً للشك إن أحمد شفيق لا يصلح أبداً للمنصب دة.

طب بالذمة مش الرد دة اقل بكتير من جمايله اللي محاوطاني من كل حتة؟ طب أعمل ايه يا ناس دلوني؟

تعليق: الحاجة الوحيدة الحقيقية اللي الراجل قالها في الحوار كله ان الطيور على أشكالها تقع!!! فعلاَ واضح انه حيبتدي يكتب أول فصل في مذكراته!!!

أليس فيهم رجل رشيد يرد على اسئلتي الحائرة بلاً من تضييع الوقت مع أمثال ذلك العبقري؟

يا جماعة اللي عندة أسئلة تانية يا ريت يتفضل يضيف على الليستة شكلنا مش حنلاقي حد يرد علينا خالص وحنضطر نطبعها في كتاب نسميه "تساؤلات الشاب الأوفر في زمن البلوفر"!!

ملحوظة: أنا حذفت اسم الراجل من المضبطة عشان بس ما انتهكش خصوصيته.أنا برضه عندي أخلاق!!!