ذكريات رجل مهم

صديق عمري وصاحبي وحبيبي وكفاءة شريف نبيل كتب مقالة أكثر من رائعة فقررت اني أشركه معايا في المدونة بالعافية وغصب عنه لإنه كاتب موهوب جداً ومش عارف قيمة نفسه


اليكم المقال:





بعد انتهاء انتخابات الإعاده فى يونيو ٢٠١٢ جلس احد رجال النظام السابق الصغار فى مكتبه الفخم مره اخرى بعد غياب دام عام ونصف، وخلال تحسسه للسطح الخشبى الفاخر لمكتبه الفخم رجع بذاكرته ٧ اشهر ليتذكر حواره مع احد اكبر رجال نظام مبارك

نوفمبر ٢٠١١
---------------
*الحق يا باشا

*ايه خير فى ايه

*المجلس العسكرى يا باشا حدد مواعيد انتخابات الرئاسه اخر يونيو المقبل ووعد الشعب بتسليم السلطه

*متخفش هم بينيموهم شويه علشان يهدوا واحنا حنولع البلد خلال الفتره الجايه والانتخابات تتأجل

*تمام كده يا باشا احسن انا اتخضيت

*متقلقش كله محسوب

---------------------------------------------------------------------------
ديسمبر ٢٠١١
---------------
*وبعدين يا باشا الناس مصممه على تسليم السلطه ومش نافع معاهم لا محمد محمود ولا مجمع علمى ولا مسبيرو ولا بلطجيه ولا حاجه والعيال معتصمين امام مجلس الوزراء والمجلس كل يوم بيأكد انه حيسلمها اخر يونيو

*ولا يهمك حننزل الانتخابات ونكسبها بمرشح تبعنا

*ازاى يا باشا وهم الثوار حيسيبوك

*يا عم الثوار بيقطعوا فى بعض ومش مجتمعين اصلاً على حاجه والاخوان قالوا مش نازلين الرئاسه والبرادعى بنشتغل عليه دلوقتى وحينسحب بسبب اللى بيحصل يبقى خلاص بتاعتنا

*طب والسلفيين يا باشا دا عندهم مرشح اسمه ابو اسماعيل عمال يجمع فى اصوات الناس

*متقلقش رجالتنا بيدعبسوا وراه واكيد ليه غلطه

*الله ينور عليك يا باشا

---------------------------------------------------------------------------
يناير ٢٠١٢
---------------
*يا باشا الايام بتجرى بسرعه والبرادعى انسحب فعلاً زى ما قلت بس ابو اسماعيل شعبيته بتزيد بطريقه مخيفه ولو دخل الانتخابات كده حيكتسح انا بدأت اقلق

*متقلقش احنا محضرين مدبحه الشهر القادم وممكن تولع البلد ونلغى الانتخابات

*مدبحة ايه يا باشا الناس خلاص مبقاش يفرق معاها

*لأ دى بقى حاجه تانيه حنخلص على الالتراس فى بورسعيد ونرتاح منهم وطبعاً زمايلهم مش حيسكتوا وحيولعوا فى بورسعيد انتقاماً وكله فى صالحنا

*ايه الحلاوه دى يا باشا دماغك دى متكلفه قوى

---------------------------------------------------------------------------
فبراير ٢٠١٢
---------------
*حوار بورسعيد مجبش نتيجه يا باشا وشكلها كده الانتخابات حتتعمل يعنى حتتعمل وابو اسماعيل فى العلالى ومش حينفع التزوير معاه ومرشحنا مش حيعرف يصد

*عايزكوا تلمعولى ابو الفتوح على الفيسبوك وخلى الشباب يرتبط بيه وشبهوه بالبرادعى وكده حيلم اصوات الاخوان والثوار ونبقى اضعفنا شويه من اصوات ابو اسماعيل لغاية ما نطيره انا جتلى اخبار حلوه عنه ممكن تطيره بره السباق

*بجد يا باشا دا كده يبقى فل قوى

---------------------------------------------------------------------------
مارس ٢٠١٢
---------------
*كده ابو اسماعيل بره زى ما قلت يا باشا بس اللى مخوفنى شعبية ابو الفتوح اللى فى الطالع كل يوم

*متقلقش احنا رمينا طعم للاخوان وحنخلى شبابهم يسيبوا ابو الفتوح

*طعم ايه يا باشا

*افرجنا على الشاطر وبنخوفهم من ابو الفتوح وهم شربوا الطعم وحينزلوا بمرشح يضرب فيه وكده مرشحنا يبقى لوحده

*لما نشوف يا باشا بس المرشح بتاعنا واقف محلك سر

*متقلقش حنلمعه فى الاخر علشان يدخل الانتخابات وهو طازه

---------------------------------------------------------------------------
ابريل ٢٠١٢
---------------
*ابو اسماعيل عامل لبش جامد وخلعه حيبقى صعب والاخوان نازلين بتقلهم يا باشا ولو ابو اسماعيل خلع، الشاطر حيركب مكانه

*متقلقش مش انا قولتلك رمينالهم الشاطر طعم

*مش فاهم يعنى حتستبعدوهم هم الاتنين يا باشا، ده كده البلد تولع ومش حنعرف نسيطر عليها تانى

*عيب عليك انا اتفقت مع عمر سليمان حينزل الانتخابات

*وهو عمر سليمان لو نزل يا باشا حيكسب!! ده حياخد من اصوات مرشحنا

*عمر سليمان نازل زى ولد الكوتشينه يقش الطربيزه ويطلع، وساعتها محدش حيقول بم

*الله عليك يا باشا يا ابو دماغ ذريه يعنى كده مش حيتبقى غير ابو الفتوح والبديل بتاع الاخوان

*بديل الاخوان امره سهل ولو وقفت عليه فى الاخر وعاد مع مرشحنا مفيش حد حيقف معاهم بعد كل اللى عملوه الفتره اللى فاتت، المهم دلوقتى ابو الفتوح ده اللى لو دخل فى اعاده مع مرشحنا كله حيلتف حوله وحيكسب مرتاح

*طب وده نعمل معاه ايه يا باشا

*لمعولى حمدين صباحى وخالد على ونزلوا فيديوهات واخبار قديمه عن ابو الفتوح وانتمائاته الاخوانيه وانشروا على الفيسبوك موضوع تأسيسه للجماعه الاسلاميه انا عارف الناس بتترعب من النوع ده والثوار حيفضلوا صباحى عليه بجانب خالد على اللى حياخد اصوات الثوار الليبراليين وكده نبقى فتتنا الاصوات المضاده على اربع او خمس مرشحين ونضمن ان مرشحنا يبقى راكب

*تمام يا باشا، عُلم وينفذ بس لو صباحى أكل الجو حنعمل ايه، ده وطنى جداً وله كاريزما عاليه وبيعرف يتكلم كويس ويجمع الناس حوله زى عبد الناصر، والغلابه لما بيحبوا حد مبيتركهوش بسهوله

*متقلقش شويه وحننشر له فيديوهات ومقالات وهو بيمجد فى القذافى وبشار وعشقه لعبد الناصر وفكره اللى صنع اصلاً دولة العسكر، كل واحد وليه غلطاته واحنا عندنا غلطات الكل وبنعرف امتى نخلى اللجان الالكترونيه تنشر ونعمل بلبله

*هو ده شغل المعلمين يا باشا

---------------------------------------------------------------------------
اول مايو ٢٠١٢
---------------
*فى كلام يا باشا ان صباحى وبقيت الثوريين حيتحدوا ومش بعيد ينضملهم ابو الفتوح

*دى تبقى مصيبه وممكن نتقلش من اول مره انا بشتغل ان احنا نمنع حدوث ده بكل الطرق

*كلنا معاك يا باشا انا مشغل اللجان الالكترونيه بتاعتنا على ودنه علشان تفرقهم بس دول اصواتهم كثير والاستطلاعات بتاعنا بتقول ان مرشحنا نسبته بين ٢٠ و ٣٠ فى المئه على الاكثر يعنى لسه ٧٠ او ٨٠ فى المئه، ليه منستبعدش الراجل التانى بتاعنا واهو كده نضمن اصواته هو كمان 

*لأ غلط ده شغال كويس قوى وشايل عن مرشحنا بلاوى وكله مركز عليه وسايب الراجل بتاعنا فى حاله، خلعه دلوقتى غلط وحيسخن الكل على الراجل بتاعنا وبعدين الاصوات اللى معاه مش كثير ومش حتفرق معانا دلوقتى

*ازاى مش حتفرق معانا مش فاهمك يا باشا

*فى ناس ضميرها بيوجعها ومش عايزه تختار حد ضد الثوره بس الناس دى طيبه وقلبها ابيض وبتحب تمشى جنب الحيط وبيحبوا الامان وبيفضلوا اللى يعرفوه عن المجهول ووجود الراجل ده محسسهم ان مرشحنا مش ضد الثوره ومخلى صوتهم معانا و الناس اللى مع الراجل التانى لما يخسر حيروحوا لمين فى الاعاده غير انهم يبقوا معانا ونتيجته فى المرحله الاولى حتخلى نتيجة الانتخابات اكثر واقعيه ولو اتزنقنا قوى نسحبه فى اخر كام ساعه ونشغل الاعلام والناس بانسحابه

*تمام يا باشا وجهة نظرك فى محلها

---------------------------------------------------------------------------
٢٥ مايو ٢٠١٢
---------------
*الله عليك يا باشا، لعبتها صح وبالورقه والقلم الراجل بتاعنا طلع الاول مع انه لم يتخطى ال٢٥ ٪ وكل اللى خايفين منهم قلشوا مفضلش غير المرسى اللى طلع الثانى

*ما انا قولتلك تفتيت اصواتهم دى اهم حاجه علشان تعرف تخرجهم من السباق، يعنى الراجل بتاعنا والاخوان مجموعهم اقل من ٥٠ ٪ ومع ذلك موجودين فى الاعاده والراجل التانى بتاعنا قولتلك مكنش حيفرق

*بس تصدق يا باشا لو كان الثوريين حمدين صباحى وخالد على وابو العز الحريرى والبسطاويسى اتحدوا كان زمانهم فى الإعاده دلوقتى ومتفوقين كمان

*ومتنساش ان لو ابوالفتوح والعوا كانوا اتحدوا كانوا دخلوا الإعاده برضه

*صح يا باشا ولو كانوا كلهم اتحدوا كانوا حيكسبوا من اول جوله، انا مش فاهم هم ازاى متوحدوش علينا، طب الشعب جديد فى الديمقراطيه وعرفنا نضحك عليه لكن الناس دى عرفتوا تفرقوهم ازاى

*دى كانت صعبه واخذت من رجالتنا مجهود جامد، ببساطه طمعنا كل واحد فيهم بالرئاسه وحسسناه انه مش حيحتاج للباقى بجانب تخويف البعض من الأخر على اساس انهم فاكرين ان منهم من يعمل مع العسكر فى الخفاء

*يا سلام عليك يا باشا بس حتعمل ايه مع المرسى

*هى دى اللعبه اللى بنلعبها من زمان، دلوقتى الكل مرعوب من الاخوان ومحدش عايز يعطيهم الرئاسه علشان ما يبقاش رئيس ومجلس شعب وبالتالى حكومه ولجنة اعداد دستور

*بس تفتكر الاسلاميين مش حيتحدوا علينا

*احنا دلوقتى معانا كل اللى بيقولوا عليهم فلول وكل المرعوبين من الاسلاميين ودول اكثر ومتنساش ان المسيحيين عمرهم ما حينتخبوا الاخوان ومتنساش الشباب اليسارى والليبرالى اللى محبط، دول مش حينزلوا فى الاعاده واللى حينزل منهم حيصوتوا لينا طبعاً، متقلقش الاخوان وانصارهم لن يتعدوا ال٤٥٪ على اقصى تقدير وكله بالديمقراطيه وبانتخابات سليمه ونزيهه ١٠٠٪

*هو ده الشغل ولا بلاش يا باشا

---------------------------------------------------------------------------
٢١ يونيو ٢٠١٢
---------------
*مبروك علينا الرئاسه يا باشا الراجل بتاعنا اخذ ٥٦٪ زى ما توقعت بالضبط

*علشان تسمع كلامى، فى حد كان يتخيل ان بعد الثوره وكل القتل والسحل اللى عملناه فى الثوار ييجى الشعب يختارنا تانى وبانتخابات سليمه كمان

*الصراحه ده ولا فى الخيال مين كان يتخيل

*كله بفضل رجالتنا وشغلهم بتواصل خلال سنه ونص 

*ومتنساش غباء الثوار يا باشا وعناد الاسلاميين وعدم تنازلهم عن افكارهم

*ومتنساش انت عناد المرشحين وعدم توحدهم، لو كانوا توحدوا على مرشح واحد كان كل مجهودنا راح هباء

*طب انا عندى سؤال يا باشا

*اسأل براحتك

*افرض يا باشا البرلمان والاخوان عملوا دستور وخلوا النظام برلمانى

*متقلقش مش حيلحقوا

*مش حيلحقوا ازاى يا باشا

*احنا اعطينالهم الفرصه انهم يحطوا الدستور وهم اتدلعوا خلاص راحت عليهم

*راحت ليه يا باشا هو ايه اللى حيحصل

*البرلمان حيتحل وحيندموا على فرصتهم اللى ضيعوها

*يتحل ازاى يا باشا

*متخفش كله دستورى وقانونى واحنا مجهزين كل حاجه والدستور حيقول ان الدوله رئاسيه وفى انتخابات نزيهه بشهادة كل العالم لسه منتهيه وفى رئيس منتخب من الشعب والعسكر مشى ويبقوا ياخدوا البرلمان تانى لو يعرفوا

*ماهى الناس اللى انتخبتهم حتنتخبهم تانى يا باشا حتغير رأيهم ازاى

*الامن حيرجع والازمات حتخلص والناس حتلاقى الغاز والعيش والبنزين وكل البلطجيه حيتقبض عليهم والراجل بتاعنا حيعمل شو جامد والناس كلها حتهتف بحياته

*ياااااااه يا باشا ده انا كأنى كنت عايش فى كابوس اسمه ثوره وانزاح
---------------------------------------------------------------------------

اللى مكتوب ده مش مقال لعلاء الاسوانى ولا منقول من اى مقاله بل هو تخيلى الشخصى لما يحدث معنا نحن الشباب حديثى العهد بالحياه السياسيه وكيف يُلعب بنا مثل العرائس عن طريق الاعلام ... انا اخترت انى اكتب الكلام باسلوب الاسوانى عن طريق حديث بين شخصين لإقتناعى انها من اسهل الطرق لنقل فكره او وجهة نظر

كلنا مقتنعين بافكار يتفق معنا فيها ناس قليلون ويختلف معنا فيها ناس اكثر فيجب ان نبحث على نقط الالتقاء ونقويها ونعرف نقاط الاختلاف ونحاول نوصل فيها لتقارب الى اكبر حد ولو لم نتفق مطلقاً، خلاص يبقى كل واحد حر بس مينفعش ان انا افرض افكارى او ارائى علي الباقى ويا كده يا بلاش ... لو لم نغير هذا الاسلوب فى الحوار يبقى لو مسكنا رسول مش رئيس برضه حنعمل مظاهرات واضرابات ولن يتغير الوضع الحالى

انا لا اتوقع تغيير فى طريقتنا نحن الناخبين الفتره القادمه وسنظل نهاجم كل المرشحين الذين لا ندعمهم بأمل ان هذا يساعد مرشحنا ولكن انا اكتب هذا الكلام واتمنى ان يصل الى المرشحين للرئاسه وان يتغاضوا عن الاختلافات بينهم ويتحدوا ضد رجال النظام القديم ليس لمصلحتنا نحن بل احتراماً لدماء وارواح اخواتنا اللى ضحوا بارواحهم وبيوتهم واسرهم وأولادهم واعينهم، ضحوا بكل ما يملكونه ...
فما أغلى عندك من ابنك او بنتك كى تيتمهم وهم صغار وفى اشد الحاجه اليك ...
و ما أغلى عندك من سماع نحيب امك وابوك وزوجتك وهم يتقطعون حزناً لفراقك ...
هؤلاء ضحوا بكل ذلك فى مقابل ما هو اغلى ... انها """مصر""" وطنا وبلدنا التى تستحق منا اكثر من ذلك بكثير

اتحدوا يرحمكم الله

شريف نبيل
14 مايو 2012