حدونة من الخيال (فزورة رمضان الوحيدة السنادي)

ليا صديق اتفقنا مع بعض اننا حنروح لـ client نتفاوض معاه على مشروع ننفذه سوا لإننا احنا الاتنين محتاجين المشروع دة عشان نحسن من وضعنا المادي. وحصل ورحنا والـ client وافق مبدئياً.
صديقي راح لنفس الـ client واتفاوض معاه عشان ياخد الشغلانة لوحده ووافق مع ضمانات انه حيعرف يشيل الليلة وزحلقني بدم بارد. 

طلب الـ client منه يقدمله دراسة للمشروع. بس لإن صاحبي مش حيعرف يشيل الليلة من غيري لإني انا اللي افهم في الإدارة أحسن منه وبعرف أعمل دراسات مشاريع 

جالي وقال لي: أنا واقع في عرضك الـ client زانقني وطالب مني دراسة للمشروع ومفيش غيرك يعملهالي. 
قلتله: انت بعتني قبل كدة واتفاوضت على الليلة كلها لوحدك.
قال لي:  كنت غبي. بس انت اعمل معايا الدراسة وانا امضي عقد المشروع وليك نسبة وحتشتغله معايا فوافقت. 

بعد ما مضى العقد قال لي أنا ما اتفقتش معاك على حاجة انت اللي فهمتني غلط وزحلقني

بعدين الـ client لما لقى شغله منيل هدده بسحب المشروع منه لو ما عملش خطة إدارية محكمة وجاب إدارة كويسة تنفذها.

راح جايلي وواقع في عرضي ان المشروع حيروح منه.

قلتله: انت بعتني قبل كدة مرتين

قال لي: أنا موعدتكش بحاجة وانت فهمتني غلط ولو يعني كنت غلطت في حقك سامحني المسامح كريم وعموماً انا في ضيقة دلوقتي ولازم تقف جنبي الأخلاق والإنسانية بيقولوا كدة.

وافقت وقعدت حطيت له خطة إدارية وعملت له شغل على مية بيضا ومضيت معاه عقد وقدم الخطة للـ client وإذ بي أفاجأ انه جاب ناس تانية صحابه وشغلهم في المشروع ومش بالخطة اللي انا عملها (يعني كان واخدها مني عشان يضحك ع الـclient) ومهماش الكفاءات اللي تشيل مشروع وحطني أنا ع الرف في شغل الأرشيف.

واجهته قال لي: ما مضيتلكش على حاجة والعقد دة تبله وتشرب ميته انا الـ client موافق على شغلي.

المجموعة بتاعته تعك الدنيا والمشروع يقرب يقع على دماغنا كلنا وهو أبداً مصر ان المشروع زي الفل ويعني لو كان فيه شوية مشاكل بسيطة نبقى من تدبير الشركة إياها اللي كانت ناصبة ع الـ client نفسه في كذا مشروع قبل كدة وحاطة عينها ع المشروع دة بالذات. طب يشتغل عدل بقى. أبداً.

الـ client  استشار مجلس إدارة المشروع في الشركة عنده وقرر يسحب إدارة المشروع من صاحبي وأعوانه ويديه لشركة تانية ويدفعه كمان شروط جزائية عشان أخل ببنود العقد
صاحبي اتجنن وراسه وألف سيف انه لازم يفضل في المشروع لإن عقده اللي هو أخل بيه أربع سنين هما مدة المشروع

جالي يستعطفني اني أقف معاه ضد الـ client  انه ظلمه وانه المفروض يفضل ماسك المشروع.
قلتله: ما ظلمكش انت اللي ظلمت نفسك لما غلطت. وبعدين انت بعتني كذا مرة قبل كدة اطمنلك ازاي انك مش حتبيعني؟ قال لي: الإنسانية والضمير يحتموا عليك انك تقف جنبي؟

قلتله: وكانوا فين الإنسانية والضمير دول لما بعتني كذا مرة عشان مصلحتك

قال لي: انت عارف اني لو مشيت الشركة إياها حتاخد المشروع باسم تاني وتنصب ع الـ client ماهو كل دة من تدبيرها أصلاً

قلتله: أنا مقدرش اني أجبر الـ client على إنه يفضل مع واحد فاشل ونصاب عشان نصاب تاني ما ياخدش المشروع.

قال لي: انت بتساويني بيه؟

قلتله: أيوة انت فاشل لإنك بترمي عجزك عن الإدارة على حد تاني حتى لو صح انه بيكعبلك فات المفروض تقوم على حيلك ونصاب لإنك فهمت الـ client انك بتعرف تدير مشروع وانت مبتعرفش.

قال لي: بس الشركة التانية ممكن فعلاً تاخد المشروع

قلت له: والله إذا كان الـ client بعد كل التحذيرات اللي احنا حذرناهاله قبل كدة وبعد التجارب السابقة مع الشركة إياها قرر انه يرجع يتعامل معاها تاني بعد ما غيرت اسمها يبقى ماله وهو حر فيه ما نقدرش نجبره على حاجة لكن ما تقنعنيش انك خايف على مصالح الـ client انت خايف على الشغل اللي حيروح منك لحد تاني.

راح هدد الـ client انه يا إما يرجع يمسك المشروع يا إما حيقتل عامل من العمال كل يوم لغاية ما الـ client يرجع في قراره
الـ client عمل فيه مذكرة في القسم وحبسه على التهديد بتاعه.

أنا بقى أعمل إيه؟ اقف مع الـ client صاحب الشغل وحقه انه شغله يمشي مظبوط وفلوسه ما تروحش في الأرض مع شوية فشلة ونصابين؟ ولا اقف مع "صاحبي" اللي باعني كدا مرة عشان هو مسجون "ظلم" من وجهة نظره من باب الإنسانية والأخلاق وعشان بعد كدة ألاقي اللي يقف جنبي؟

THIS IS THE DILEMMA

على فكرة الحدوتة دي زي ما فيها اسقاطات سياسية قد ما فيها معضلة أخلاقية لازم الواحد يقف عندها. القصة دي حصلتلي في حياتي العملية وأكتر من مرة. يمكن مش بنفس التفاصيل بس المضمون واحد. وبرضه مكنتش عارف أحل المعضلة دي ازاي.